Исроил армияси босиб олинган Ғарбий Соҳилда жойлашган Тулкарм шаҳридаги Нур Шамс қочқинлар лагерида яна 25 та бинони бузишга буйруқ берди. Бу ҳақда Тулкарм губернатори Абдуллоҳ Комилга таяниб, Anadolu хабар берди.
Абдуллоҳ Комил Исроилнинг бу ҳаракатини “зулмнинг очиқ намойиши ҳамда Нур Шамс ва Тулкарм лагерларидаги фаластинликларга қарши содир этилган жиноятларнинг бир қисми” деб атади. Унинг сўзларига кўра, юқоридаги лагерларда яшовчи фаластинликлар мунтазам бузишлар сабаб мажбуран кўчириб юборилмоқда.
Абдуллоҳ Комил халқаро ҳамжамиятни Исроилнинг бу каби хатти-ҳаракатларига чек қўйиш учун чора кўришга чақирди. Унинг таъкидлашича, бу ҳаракатлар халқаро нормалар ва конвенциялар, инсон ҳуқуқлари ҳужжатлари ҳамда халқаро гуманитар қонунларнинг очиқдан-очиқ бузилиши ҳисобланади.
Исроилнинг кенгайиб бораётган ҳужумлари
Исроил ҳарбийлари 2025 йилнинг 21 январидан бошлаб Ғарбий Соҳилнинг шимолий қисмида шиддатли бузғунчиликларни амалга ошириб келмоқда. Дастлаб ҳужумлар Жинин шаҳридаги қочқинлар лагерига қаратилган бўлса, кейинчалик Тулкарм ва Нур Шамс қочқинлар лагерлари ҳам нишонга олинди. Исроил кучлари бу лагерларидан 50 мингдан ортиқ фаластинликни мажбуран кўчирди.
Исроил 19 та ноқонуний аҳоли пунктига рухсат берди
Бундан ташқари, Исроил Вазирлар маҳкамаси 11 декабрь куни кўплаб кўчманчилар постларини (аҳоли пунктлари) қонунийлаштириш ва ташкил этишни маъқуллади. Қарор Ғарбий Соҳил бўйлаб 19 та аҳоли пунктини, шу жумладан, 2005 йилги ажратиш девори режасида эвакуация қилинган иккита постни ҳам қонунийлаштиришга рухсат беради.
Қарор эълон қилинганига жавобан, Фаластин президенти матбуот котиби Набиль Абу Рудейна қуйидагича муносабат билдирди:
“Исроил аҳоли пунктлари борасидаги фаолияти ноқонуний бўлиб, халқаро ҳуқуқ ва халқаро қонуний қарорларнинг бузилиши саналади”.
Қайд этилишича, бу аҳоли пунктлари халқаро қонунларга кўра ноқонуний бўлишидан ташқари, Исроил қонунларига ҳам зиддир. Кўчманчилар бу постларни келажакда ноқонуний қурилишларга рухсат олиш мақсадида ўрнатади. Янги қонунийлаштирилган аҳоли пунктларининг аксарияти Ғарбий Соҳилнинг ички қисмида жойлашган.
