Греция 31 август куни Исроил билан қиймати қарийб 3 миллиард евро (3,5 миллиард доллар) бўлган кўп қатламли ҳаво мудофааси тизимини харид қилиш бўйича битим имзолаши кутилмоқда. Бу ҳақда икки нафар хавфсизлик манбасига таяниб Reuters хабар берди.
Битим Грециянинг кенг кўламли ҳарбий модернизация дастурининг бир қисми бўлиб, қисқа, ўрта ва узоқ масофали илғор ракета тизимларини ўз ичига олади.
Манбалардан бирининг айтишича, Греция расмийлари 31 август, душанба куни Тель Авивда Исроил Мудофаа вазирлигининг SIBAT ва MAFAT дирекциялари билан умумий қиймати қарийб 3 миллиард евролик тўртта келишув имзолайди.
Улар уч турдаги ракета ва радар тизимларини қамраб олади. Греция 2036-йилгача “Ахилл қалқони” номли кўп қатламли баллистик ракеталарга, самолётлар ва дронларга қарши мудофаа тизимини яратиш учун қарийб 28 миллиард евро сарфлашни режалаштирмоқда.
Шунингдек, Афина АҚШдан 40 тагача Ф-35 қирувчи самолёти, Франция ва Италиядан эса фрегатлар харид қилишни режалаштирган.
Манба алоҳида битим доирасида дронларга қарши мудофаа тизими ҳам харид қилинишини қўшимча қилган.
Ҳозирда Греция ҳаво ҳудудини ҳимоя қилиш учун АҚШда ишлаб чиқарилган Патриот тизимлари, Россиянинг С-300 тизимлари ва турли қисқа масофали ҳаво мудофааси воситаларидан фойдаланади.
Мамлакат мудофаа харажатларига ялпи ички маҳсулотининг қарийб 3,5 фоизини сарфлайди. Бу кўплаб НАТО давлатларига қараганда юқори кўрсаткич бўлиб, бунга Грециянинг қўшни Туркия билан узоқ йиллардан бери давом этаётган низоси ҳам сабаб бўлмоқда.
Греция ва Исроил ўртасида иқтисодий ва дипломатик алоқалар мустаҳкам. Икки давлат Грецияда ҳаво кучлари учун ўқув марказини биргаликда бошқаради, ҳар йили қўшма ҳарбий машғулотлар ўтказади, шунингдек, дронларга қарши тизимлар ва киберхавфсизлик соҳаларида ҳамкорлик қилади.
2025-йилда Афина Исроилда ишлаб чиқарилган 36 та ракета-артиллерия тизимини қарийб 650 миллион еврога сотиб олган эди.
