Қашқадарё вилояти Муборак туманидаги “Хитой” жоме масжидида юз берган жанжалда собиқ мутавалли калтакланди. Ушбу ҳолат ижтимоий тармоқларда “имом дўппосланди” дея талқин қилинганди.
Мусулмонлар идораси вилоят вакиллигининг маълум қилишича, воқеа 3 апрель куни жума намозидан сўнг содир бўлган. Унда иштирок этган шахс масжид имоми эмас, балки аввал ушбу масжидда мутавалли бўлиб ишлаган К.Ж. экани аниқланган. У илгари маълум сабабларга кўра лавозимидан озод этилган.
Қайд этилишича, собиқ мутавалли жамоат орасида бир фуқаро билан тортишиб, уни ҳақорат қилгани ортидан вазият кескинлашган. Оқибатда ўзаро жанжал юзага келган ва кейинчалик маҳалла оқсоқоллари ҳамда нуронийлар аралашуви билан ҳолат жойида бартараф этилган.
Вилоят Ички ишлар бошқармаси ахборот хизмати хабарига кўра, воқеа соат тахминан 13:40 ларда юз берган. Фуқаролар ўртасидаги жанжал оқибатида фуқаро Ж. (собиқ ходим) енгил тан жароҳати олган.
Ҳолат юзасидан Жиноят кодексининг 277-моддаси (безорилик) 2-қисми билан жиноят иши қўзғатилиб, тергов ҳаракатлари олиб борилмоқда. Бошқарма ҳолатни нотўғри талқин қилмасликни сўради.
