Қашқадарё вилоятида диний мазмундаги тақиқланган материаллар билан боғлиқ текширувни “ижобий ҳал қилиб бериш”ни ваъда қилган ИИБ ходими ва воситачи тезкор тадбирда ушланди. Бу ҳақда Давлат хавфсизлик хизмати маълум қилди.
Маълум бўлишича, Қашқадарё вилояти Деҳқонобод туманида яшовчи 1983 йилда туғилган аёл ва унинг 2009 йилда туғилган қизи телефонларида диний мазмундаги тақиқланган материаллар аниқлангани юзасидан вилоят ИИБ томонидан текширув ҳаракатлари олиб борилган.
Шундан сўнг, мазкур масалани “танишлари орқали ҳал қилиб бериш”ни ваъда қилган 1978 йилда туғилган шахс аёл томонидан берилган 3 миллион сўмни олган вақтида ушланган.
Тезкор тадбир давомида эса ушбу ишни ижобий ҳал қилиб бериш эвазига воситачидан 2,5 миллион сўм олган вақтида Қашқадарё вилояти ИИБ Тезкор қидирув хизмати тезкор вакили ашёвий далиллар билан қўлга олинган.
Ҳозирда ИИБ ходимига нисбатан Жиноят кодексининг 210-моддаси (пора олиш) воситачига нисбатан эса Жиноят кодексининг 212-моддаси (пора олиш-беришда воситачилик қилиш) моддалари билан жиноят иши қўзғатилиб, тергов ҳаракатлари олиб борилмоқда.
