Копенгаген университети археологларининг халқаро гуруҳи Иордания жанубидаги саҳрода тахминан 5500 йил аввалги улкан маросим мажмуасини аниқлади. Бу ҳақда Good News Network нашри хабар бермоқда
Олимларнинг фикрича, бу мажмуа чуқур инқирозни бошдан кечираётган жамият томонидан қурилиб, қадимги одамларга экологик ва ижтимоий ўзгаришлар олдида бирлашишга ёрдам берган.
Тадқиқотчилар 95 дан ортиқ дафн иншоотлари (долменлар), тик тошлар ва мегалитик биноларни топишган. Таҳлилларнинг кўрсатишича, бу мажмуа яшаш учун мўлжалланмаган — иншоотларда том ва ўчоқлар бўлмаган, бу эса уларни қаттиқ саҳро иқлимида истиқомат қилишга яроқсиз қилган.
Олимларнинг маълумотларига кўра, иншоотлар ўзининг мис буюмлари ва бой рамзлари билан танилган энеолит маданияти (милоддан аввалги 4500-3500 йиллар) инқирозга учраганидан сўнг қурилган. Археологик ва экологик маълумотлар қурғоқчилик даври бошланганини кўрсатмоқда. Бу эса савдо алоқаларининг узилишига ва анъанавий ҳунармандчиликнинг йўқолишига олиб келган.
Бу ерда жойлашган мажмуа, эҳтимол, тарқоқ гуруҳларнинг йиғилиш жойи бўлиб хизмат қилган. Улар у ерда охират билан боғлиқ маросимлар ва бошқа жамоавий тадбирларни ўтказиш учун тўпланишган.
