Тахминан 2030 йилга бориб умумий сунъий интеллект (AGI) ёки бошқача айтганда “ўта кучли СИ” пайдо бўлиши мумкин. Бу ҳақда Google компаниясининг СИ (сунъий интеллект) бўлинмаси ҳисобланган DeepMind бош директори Демис Хассабис маълум қилди.
Унинг сўзларига кўра, бундай тизимларнинг ривожланиши бирдан содир бўладиган кескин сакраш кўринишида эмас, балки технология ва фан учун янги имкониятларни очиб берувчи босқичма-босқич такомиллашишлар серияси орқали амалга ошади.
Хассабиснинг қайд этишича, AGI’нинг пайдо бўлиши таъсир кучи жиҳатидан “саноат инқилобидан ўн баробар кучлироқ ва ўн баробар тезроқ” содир бўладиган ҳодисага айланиши мумкин. Шу билан бирга, у технологиялар ривожланиши албатта салбий оқибатларга олиб келмаслигига ишонч билдирган. Унинг фикрича, сунъий интеллект тиббиёт, материалшунослик, математика ва энергетика соҳаларидаги ривожланишни тезлаштиришга қодир.
AGI пайдо бўлганини баҳолаш учун DeepMind раҳбари ўзининг шахсий “Эйнштейн тести” вариантини таклиф қилган: тизимга физика фанини фақат 1901 йилгача бўлган давр бўйича ўргатиш керак, сўнгра у Альберт Эйнштейн 1905 йилдан бошлаб эълон қила бошлаган кашфиётларга ўхшаш янгиликларни мустақил равишда ярата олиш-олмаслигини текшириб кўриш лозим. Хассабис ҳозирги моделлар бунга ҳали қодир эмаслигини тан олган, бироқ келажакда бундай имкониятнинг пайдо бўлишини ҳақиқатга яқин деб ҳисоблайди.
DeepMind раҳбари, шунингдек, сунъий интеллект бозорини “технологиялар тарихидаги энг шафқатсиз рақобат” деб атаган ва Google бу борада кучли тадқиқот базасига ҳамда технологияларни оммавий сервисларга жорий этиш тажрибасига эга эканлигини таъкидлаб ўтган.
