“Ўргимчак-одам” франшизаси актёри Том Ҳолланд иштирок этган лойиҳалар жаҳон прокатида жами 14,7 миллиард доллар атрофида даромад келтирди. Сўнгги ҳисоб-китобларга кўра, актёр энг кассабоп актёрлар рўйхатида учинчи поғонадан жой олди.
Айни пайтда ундан юқори ўринларни Зоэ Салдана ва Скарлетт Йоханссон эгаллаб турибди. Салдана жорий йил бошида экранларга чиққан “Аватар: Олов ва кул” фильмининг муваффақияти ортидан рейтинг пешқадамига айланган эди — унинг иштирокидаги картиналар жами 15,46 миллиард доллардан ортиқ маблағ тўплаган.
Томнинг рўйхатда сезиларли даражада олдинга силжишига жорий йилдаги икки шов-шувли релиз— “Одиссея” ва “Ўргимчак-одам: Янги кун” фильмлари катта ёрдам берди. Ҳар иккала фильм ҳам жаҳон прокатида бир миллиард долларлик маррани босиб ўтди. Август ойи ўрталаридаёқ ғарб оммавий ахборот воситалари янги “Ўргимчак-одам”нинг якуний тушумларидан сўнг актёр рейтингда етакчилар қаторига қўшила олишини прогноз қилган эди.
Актёр бундай натижа учун Marvel студиясидан қарздор. Унинг фильмографиясида энг кўп даромад келтирган фильмлар — “Қасоскорлар: Абадият жанги” ва “Қасоскорлар: Интиҳо”, шунингдек, Ўргимчак-одам ҳақидаги олдинги учта муваффақиятли фильм жой олган.
