Эрон олий раҳнамоси Оятуллоҳ Али Хоманаий Теҳрон ташқарисидаги хавфсиз жойда сақланмоқда. Бу ҳақда Эрон раҳбариятидаги манбага асосланиб, Reuters агентлиги хабар берди.
“Манба бошқа тафсилотларга ойдинлик киритмаган”, деб ёзади The Guardian нашри.
Al-Jazeera АҚШ ҳукуматидаги манбасига таяниб, Исроил ва АҚШнинг 28 февраль куни Эронга берган зарбаларидан кўзланган мақсад мамлакат ҳарбий раҳбариятини йўқ қилиш бўлганини хабар қилганди. Хусусан, Теҳрон шаҳридаги Эрон президенти Масъуд Пезешкиён ва оятуллоҳ Хоманаийнинг қароргоҳларига ҳаводан ҳужум қилинган.
“Пезешкиён жабрланмаган”, дея хабар бермоқда Эроннинг Меҳр агентлиги ўз манбасига таяниб.
28 февраль куни эрталаб Исроил Эронга “олдини олувчи зарба” беришини эълон қилди. Мамлакатда фавқулодда ҳолат режими ва чекловлар, жумладан, йиғилишлар ўтказиш, мактабларда дарслар ва идораларда ишлаш (асосий соҳалардан ташқари) тақиқланди. Исроил мудофаа кучлари сиреналар чалингани ва бошпаналар яқинида бўлиш зарурлиги ҳақида огоҳлантиришлар берилганини маълум қилди.
“Меҳр” нашри бир нечта ракета Университет кўчаси ва Теҳроннинг марказий майдони бўлган Жумҳурий туманига келиб тушганини ёзди. Яқин атрофда Эрон раҳбарларининг қароргоҳи — Саъдобод саройи жойлашган. Кейинроқ Tasnim агентлиги янги портлашлар ҳақида хабар берди.
Associated Press агентлиги Америка Қўшма Штатлари америкалик мансабдор шахс ва операциядан хабардор манбага таяниб, Исроилнинг Эронга қарши ҳужумларида иштирок этаётганлиги ҳақида хабар берди.
Дональд Трамп Truth Social’даги саҳифасига жойлаштирилган 8 дақиқалик видеомурожаатида АҚШ Эронга қарши кенг кўламли ҳарбий амалиёт бошлаганининг тасдиқлади. Оқ уй раҳбари Вашингтон энди “бунга тоқат қилолмаслигини” таъкидлаб, эронликларни ҳукуматини ағдаришга чақирди.
