Нидерландия 2022-йилда Маастрихт шаҳрида бўлиб ўтган санъат ярмаркасида ўғирланган 3,5 минг йиллик бюстни Мисрга қайтариб берди. Бу ҳақда Reuters агентлиги хабар берди.
Бюст фиръавн Тутмос III давридаги (тахминан, милоддан аввалги 1479-1425-йиллар) юқори мартабали амалдорнинг гранодиорит ҳайкалининг бир қисми ҳисобланади. Объект мамлакатга Миср жанубидаги Луксор шаҳридан кириб келган. Илгари бундай ҳайкаллар мақбара ва ибодатхоналарга ўрнатилган.
Артефактнинг ҳақиқийлигини текшириш тарихи 2022-йилда бошланган. Ўшанда бюст Маастрихт кўргазмасида топилган. Кўргазма давомида мутахассисларда артефактнинг келиб чиқишига шубҳа пайдо бўлган ва Британия музейи мутахассиси билан маслаҳатлашилган. Sycomore Ancient Art дилери полицияга ариза берган.
Нидерландия полицияси та`кидлашича, ҳайкалнинг келиб чиқишини тасдиқловчи ҳужжатлар аввалги сотувчилар томонидан сохталаштирилган. Шунингдек, тергов давомида бюст Мисрнинг Луксор шаҳрида “араб баҳори” пайтида ўғирлангани аниқланган. Миср ҳукумати Нидерландиядан бюстни қайтаришни сўраган.
“Бу объект талончилик натижасида олиб чиқиб кетилгани жуда ачинарли. Бу тош калла бу ерда бўлмаслиги керак, санъат асарлари бозорида ҳам бўлмаслиги керак. У Мисрда бўлиши керак”, деди Нидерландия таълим, маданият ва фан вазири Гук Моэс ҳайкални топшириш маросимида.
