Миср пойтахти Қоҳирада 20 йиллик қурилиш ва кечикишлардан сўнг қиймати 1 миллиард долларга тенг “Буюк Миср музейи” (Grand Egyptian Museum) очилди. Бу ҳақда Euronews хабар берди.
Мазкур музей — дунёдаги энг катта қадимий цивилизацияга бағишланган музей бўлиб, унда 50 мингдан ортиқ экспонат, жумладан, фиръавн Тутанхамон мақбарасидаги барча бойликлар илк бор тўлиқ намойиш этилмоқда.
Президент Абдул Фаттоҳ ас-Сиси музейни “инсоният маданияти тарихидаги ноодатий воқеа” деб атаб, қадимги мисрликлар даҳоси билан замонавий мисрликларнинг ижодкорлигини бирлаштирганини таъкидлаган.
Музей йилига 5 миллионга яқин сайёҳни жалб этиши кутилмоқда. Бу кўрсаткич уни дунёдаги энг кўп ташриф буюриладиган музейлар қаторига киритади — таққослаш учун, Франциядаги Лувр музейига 2024 йилда 8,7 миллион киши ташриф буюрган.
Етти мўъжиза пирамидалар ёнида жойлашган бу улкан бино учбурчак шаклли дизайни билан ажралиб туради. Ички қисмидаги олти қаватли зиналар қадимий ҳайкаллар билан безатилган. Музейда кўргазмалар билан бир қаторда конференция зали, кутубхона, болалар музейи ҳамда ресторанлар ҳам мавжуд.
Бироқ айрим машҳур қадимий ашёлар ҳали бу кўргазмага қўйилмаган. Масалан, Розетта тоши ҳозирча Лондондаги Британия музейида, Нефертити ҳайкали эса Берлиндаги Неуэс музейида сақланмоқда. GEM очилиши мисрликлар орасида бу артефактларни ватанга қайтариш талабини яна кучайтирган.
Музей қурилиши 2005 йилда бошланган, аммо сиёсий беқарорлик ва пандемия сабаб бир неча бор кечиктирилган. Музей 2024 йилнинг октябрь ойида қисман очилган бўлиб, унинг тантанали очилиши 2025 июль ойига режалаштирилган эди. Бироқ бу даврда Исроил ва Эрон ўртасида бўлиб ўтган 12 кунлик уруш туфайли маросим қолдирилганди.Энди эса 4 ноябрдан бошлаб у ҳар куни соат 9:00 дан 18:00 гача очиқ бўлади. Катталар учун кириш чиптаси 1 450 миср фунти (тахминан 27 евро) этиб белгиланган.
