Мисрда археологлар ноёб ва қадимий, доира шаклидаги ибодатхонани топди. Дастлабки маълумотларга кўра, ушбу иншоот тахминан 2200 йил аввал муқаддас сув ритуаллари (маросимлари) учун ишлатилган. Бу ҳақда “Daily Mail” хабар берди.
Ибодатхона ҳозирги Порт-Саид шаҳридан жануби-шарқда жойлашган қадимги Пелузий порти ҳудудидан топилган. Мажмуа марказида диаметри тахминан 35 метр бўлган йирик сув ҳавзаси жойлашган бўлиб, у Нил дарёси билан каналлар ва резервуарлар тизими орқали боғланган.
Тадқиқотчиларнинг фикрича, иншоот кам ўрганилган худолардан бирига бағишланган бўлиши мумкин. Ҳавзанинг марказида квадрат шаклидаги пойдевор топилган.
Америка Археология институти египтологи Стив Харвининг таъкидлашича, ибодатхонанинг айнан қайсидир илоҳга бағишлангани тасдиқланса, бу аввал фақат ёзма манбалардан маълум бўлган культнинг (эътиқоднинг) камёб моддий далилига айланади.
Тарихчилар Нил дарёси қадимги мисрликлар ҳаётида асосий рол ўйнаганини таъкидламоқда: дарёнинг ҳар йилги тошиши тупроқ унумдорлигини таъминлаган ва муҳим рамзий маънога эга бўлган. Ибодатхона ичида Нил лойқаси ва сув йиғиш тизими излари топилган, бу эса унинг дарё культлари билан боғлиқлигини тасдиқлайди.
Милоддан аввалги VIII аср атрофида асос солинган Пелузий шаҳри Нил дельтаси чегарасида стратегик мавқега эга бўлиб, муҳим савдо ва мудофаа пункти бўлиб хизмат қилган. Турли даврларда у Миср, Юнон ва Рим цивилизациялари таъсирида бўлган.
