Шавкат Мирзиёев томонидан 21 апрель куни имзоланган қонун билан ҳакамлик судлари фаолиятини янада такомиллаштириш ва бюджет интизомини кучайтиришга қаратилган бир қатор ўзгартириш ва қўшимчалар киритилди.
Ҳужжатга кўра, эндиликда айрим турдаги низолар ҳакамлик судлари томонидан кўриб чиқилмайди. Хусусан, ер билан боғлиқ масалалар, бино ва иншоотларга эгалик ҳуқуқини белгилаш билан боғлиқ низолар, шунингдек бюджет тизими маблағлари ҳамда давлат органлари, ташкилотлари ва муассасалари, давлат улуши мавжуд корхоналар ва фуқароларнинг ўзини ўзи бошқариш органларидан пул маблағларини ундиришга оид ишлар ҳакамлик судлари ваколатидан чиқарилди.
Қонун билан ҳакамлик судьялари фаолиятига қўйиладиган талаблар ҳам кучайтирилди. Эндиликда улар Адлия вазирлиги томонидан тасдиқланадиган махсус дастур асосида ўқитилиши ва мунтазам равишда ўз билим ҳамда малакасини ошириб бориши шарт этиб белгиланди.
Шунингдек, Маъмурий жавобгарлик тўғрисидаги кодексга киритилган ўзгартиришларга кўра, ҳакамлик судларини қонунга хилоф равишда ташкил этганлик учун мансабдор шахсларга базавий ҳисоблаш миқдорининг 5 бараваридан 10 бараваригача миқдорда жарима қўлланади. Давлат органлари ва бошқа тузилмалар ҳакамлик битими тарафлари бўлиши мумкин бўлмаган ҳолатларда ҳам шундай жавобгарлик чоралари белгиланди.
Бундан ташқари, қонун билан ҳакамлик судлари фаолиятини ташкил этиш тартиблари аниқлаштирилиб, уларнинг ҳуқуқий мақоми, фаолият юритиш механизмлари ҳамда қарорлар ижроси билан боғлиқ нормалар такомиллаштирилди. Жумладан, айрим ҳолатларда ҳакамлик судлари қарорларини мажбурий ижро этиш чекланиши ҳам назарда тутилган.
Мазкур ўзгартиришлар ҳакамлик судлари фаолиятини халқаро стандартларга яқинлаштириш, низоларни ҳал этишда шаффофликни таъминлаш ва бюджет маблағларидан фойдаланиш устидан назоратни кучайтиришга хизмат қилиши таъкидланмоқда. Қонун расмий эълон қилинган кундан эътиборан уч ой ўтиб кучга киради.
