Кеча, 9 июнь кунт суданлик мигрант Британиянинг Белфаст шаҳрида 40 ёшли эркакка пичоқ билан ҳужум қилди. Шундан сўнг мамлакатнинг турли ҳудудларида маҳаллий аҳолининг оммавий норозилик намойишлари бошланиб кетди. Бу ҳақда BBC хабар берди.
Қайд этилишича, Белфаст кўчаларидан бирида 30 ёшли Судан фуқароси ошхона пичоғи билан 40 ёшли эркакка ҳужум қилган. Йўловчилар уни тўхтатиб қолишга уринган, бироқ у эркакнинг боши, бўйни ва орқа қисмига оғир шикаст етказишга улгурган. Қўлга олинганидан сўнг, мигрантга қотилликка уриниш, ўлдириш билан таҳдид қилиш ва жамоат жойида совуқ қуролга эгалик қилиш айбловлари қўйилди. У 10 июнь куни суд олдида жавоб беради.
BBC хабарига кўра, мазкур воқеадан сўнг Шимолий Ирландия ва Шотландияда мигрантларга қарши норозилик намойишлари авж олган. Юзлаб намойишчилар Глазго марказига юзларини тўсган ҳолда тўпланган. Кўпчилик Буюк Британия байроқларини кўтариб, турли шиорларни ҳайқириб айтган. Шунингдек, ўнлаб намойишчилар Эдинбургдаги Муқаддас Андрей майдонида ҳам намойиш ўтказган.
“Бу ҳодиса душанба куни Белфастда содир этилган пичоқли ҳужум муносабати билан суданлик мигрантга қотилликка уриниш айби қўйилганидан кейин юз берди. 30 ёшли эркакка, шунингдек, жамоат жойида тиғли ёки ўткир учли буюмни сақлаш ва ўлдириш билан таҳдид қилиш айбловлари ҳам қўйилган.
Ҳужум қурбони кўзи, орқа қисми ва юзидан жароҳат олган. Полиция гумонланувчини Судан фуқароси деб таърифлади”, дейилади хабарда.
Ушбу воқеалардан сўнг Белфастда намойишчилар тўпланиб, чиқинди қутиларига ўт қўйган ва автобусни ёқиб юборган. Кейинчалик бутун Шотландия ва Буюк Британиянинг қолган ҳудудларида ҳам кўплаб намойишлар бошланиб кетган.
“Euronews”нинг ёзишича, Буюк Британия Бош вазири Кир Стармер ҳужумни қоралаб, уни “жирканч” деб атаган, бироқ “мамлакат кўчаларида бу каби даҳшатли зўравонлик саҳналарига асло тоқат қилмаслигини” билдирган.
