Украина дронлари 10 август куни эрталаб Татаристонга ҳужум қилди. Оқибатда Нижнекамск шаҳрида 13 киши ҳалок бўлди. Бу ҳақда Татаристон раҳбари Рустам Миннихановга таяниб, “Meduza” хабар берди.
Маълумотларга кўра, 75 киши тиббий ёрдам сўраб мурожаат қилган, улардан 21 нафари касалхонага ётқизилган. Расмийлар ишлаб чиқариш ва фуқаролик объектлари ҳужумга учраганини маълум қилган, бироқ бошқа тафсилотларни келтирмаган. Татаристонда қурбонлар хотирасига мотам эълон қилинган. Россия “теракт” бўйича иш қўзғатган.
Нижнекамск мери Радмир Беляев ҳалок бўлганлар орасида бола ҳам борлигини айтди. Унинг сўзларига кўра, дронлар нафақат саноат объектларига, балки турар жой секторларига ҳам зарба берган. Ҳужум оқибатида Нижнекамск нефтни қайта ишлаш заводида ёнғин чиққан. Украина Қуролли кучлари Бош штаби дронлар “Танеко” нефтни қайта ишлаш заводига зарба берганини маълум қилди. Бошқа тафсилотлар келтирилмади.
Россия Мудофаа вазирлиги эса тунда 16 та ҳудуд, жумладан, Татаристон, ҳамда аннексия қилинган Қрим устида Украинанинг 456 та дрони йўқ қилинганини билдирди. Ростов вилояти устида бир кечада 70 дан ортиқ, Калуга вилоятида эса 16 та дрон уриб туширилган. Жабрланганлар ва вайронагарчиликлар ҳақида маълумот берилмаган.
Босиб олинган Севастополда дронларнинг парчалари қулаши оқибатида Анжир пляжи яқинидаги ўрмонда ёнғин чиққан. Пляждаги кемпингда дам олаётган одамлар эвакуация қилинган.
