Бугун, 3 сентябрь куни Сурхондарё вилоятининг Ангор туманидаги дўконда ёнғин содир бўлди. Бу ҳақда вилоят Фавқулодда вазиятлар бошқармаси хабар берди.
Маълум қилинишича, соат 07:38 да “112” тизимидан Сурхондарё вилояти ФВБга, Ангор тумани, “Янгитурмуш” МФЙ, Ат-Термизий кўчасида дўкон ёнаётганлиги тўғрисида хабар келиб тушган.
Хабарга асосан 3 та қутқарув бўлинмаси зудлик билан ҳодиса жойига етиб бориб, ёнғин соат 07:48 да ўраб олинган ва соат 08:15 да ўчирилган.
Дастлабки маълумотга кўра, ёнғин оқибатида 2 та кийим-кечак савдо дўконининг тахминан 35 квадрат метр майдони зарарланган.
Билдирилишича, ҳодисада тан жароҳати олганлар йўқ. Ҳозирда ёнғин сабаби ва зарари аниқланмоқда.
