Россиянинг Санкт-Петербург халқаро иқтисодий форумида Россия Президенти Владимир Путин тасвири туширилган кумуш “Россия” номли жетон тақдим этилди. Жетон Волго-Вятский зарбхонасида зарб қилинган. Бу ҳақда РИА Новости хабар берди.
Жетоннинг бир томонида Путин кўринишидаги портрети ва “Бизнинг ишимиз ҳақ, ғалаба бизнинг томонда бўлади” деган ёзув туширилган. Иккинчи томонида эса Россия қилич ва давлат герби тасвирланган қалқон ушлаб турган аёл қиёфасида акс эттирилган.
Жетон 2025 йилда 31,1 грамм (бир троя унсияси) соф кумушдан тайёрланган бўлиб, унинг нархи 25 минг рублни ташкил этади.
Мутахассисларнинг фикрича, жетон дизайни Иккинчи жаҳон урушидаги ғалаба шарафига таъсис этилган ва Иосиф Сталин профили туширилган машҳур совет медали билан ўхшашликларга эга. Ўша медалнинг олд томонида Сталин тасвири, унинг атрофида эса “Бизнинг ишимиз ҳақ” ва “Биз ғалаба қозондик” деган ёзувлар бўлган.
Мазкур совет медали фашист босқинчиларига қарши ватан ҳимоясида қатнашганларга берилган бўлиб, қарийб 15 миллион киши ушбу мукофот билан тақдирланган.
Ҳозирча янги жетон муаллифлари унинг дизайни совет давридаги медалга ўхшашлиги борасида ҳеч қандай изоҳ бермаган.
