Бразилиялик футбол афсонаси Роналдиньо Италиянинг “Равенна” клубининг янги футболчиси сифатида таништирилди. Бу ҳақда “Ansa” хабар берди.
Тақдимот маросими Равенна шаҳрида бўлиб ўтди. Роналдиньо саҳнага ўз исми ва 10-рақами ёзилган клуб либосида чиқди.
“Дўстларим билан бу ерда эканимдан жуда хурсандман. Бизда яхши натижага эриша оладиган жамоа бор. Мен ўйнайманми ёки йўқми – буни фақат мураббий ҳал қилади. Италия билан қайта бирлашиш ажойиб. Мен жамоадошларимга ғалаба қозонишда ёрдам бериш учун шу ердаман. Кўриб турганингиздек, яхши жисмоний ҳолатдаман, ўзимни яхши ҳис қиляпман. Агар фаолиятимдаги 300-голимни урсам, бу янада гўзал бўлар эди”, – дейди Роналдиньо.
Маълумот учун, Июнь ойида Роналдиньо “Равенна” билан шартнома имзолаган эди. Март ойида 46 ёшга тўлган собиқ бразилиялик футболчи клуб инвестори ҳам ҳисобланади. Томонлар келишув тафсилотларини ошкор қилмаган.
Роналдиньо 2015 йилда Бразилиянинг “Флуминенсе” клуби билан шартномасини бекор қилиб, футболчилик фаолиятини якунлаган. “Барселона” билан у Испания чемпионатининг икки марта ғолиби ва Чемпионлар лигаси ғолибига айланган. Шунингдек, у “Пари Сен-Жермен”, “Милан”, “Фламенго”, “Атлетико Минейро” ва “Гремио” клубларида ҳам тўп сурган.
Бразилия терма жамоаси билан Роналдиньо 2002 йилги Жаҳон чемпионати, 1999 йилги Америка Кубоги ва 2008 йилги Олимпиадада бронза медалини қўлга киритган.
2005 йилда у “France Football” журнали томонидан дунёнинг энг яхши футболчисига бериладиган “Олтин тўп” мукофотига сазовор бўлган.
