Ўзбекистонда Тожикистон капитали иштирокидаги корхоналар сони бир йилда 95 тага кўпайди. Бу ҳақда Статистика қўмитаси маълумот берди.
2026 йил 1 февраль ҳолатига кўра, Ўзбекистонда Тожикистон бизнес вакиллари сармояси асосида 410 та корхона фаолият юритмоқда. Бир йил илгари бу рақам 315 та бўлган.
Ҳозир мамлакатда тожик бизнеси иштирокида 102 та қўшма, 308 таси хорижий корхоналар мавжуд. Бунда энг кўп корхоналар савдо соҳасида бизнес юритмоқда — 144 та. Кейинги ўринда саноат (89 та) ва қурилиш (43 та) улуши юқори.
Ахборот ва алоқа бўйича 33 та, яшаш ҳамда овқатланиш тармоғида 23 та корхона ишламоқда. Ташиш ва сақлаш йўналишида 16 та, соғлиқни сақлаш ва ижтимоий хизматлар кўрсатишда 11 та, қишлоқ, ўрмон ва балиқ хўжалигида 5 та корхона фаолият юритяпти. Яна бошқа соҳаларда 57 та корхона ишламоқда.
Жорий йил 1 февраль ҳолатига кўра, Ўзбекистонда чет эл инвестициялари иштирокида жами 18 513 та корхона фаолият юритмоқда. Шундан 4 282 таси қўшма, 14 231 таси хорижий корхоналар ҳисобланади.
Ўзбекистонда Марказий Осиё давлатлари орасида Қозоғистон капитали иштирокидаги корхоналар улаши энг кўп бўлиб, жами 1 221 тани ташкил этган. Мамлакатда Қирғизистон капитали иштирокида 344 та, Туркманистон тадбиркорлари сармояси асосида 279 та корхона бор.
