Ижтимоий тармоқларда Патруль-пост хизмати ходими 2 нафар вояга етмаган, 14 ёшли қизларни зўрлик ишлатиб тоққа олиб чиққани ва уларга тегажоғлик қилгани ҳақида хабарлар тарқалди.
Қизларнинг айтишича, воқеа 28 апрелга ўтар кечаси Тошкент вилояти Оҳангарон шаҳрида содир бўлган. 14 ёшли қизнинг таъкидлашича, ўша куни кечқурун дугоналари билан кўчада ўтирган вақтида уларнинг олдига Spark автомобили келиб тўхтаган ва уларни мажбуран машинага миндирган.
“Бизнинг олдимизга Spark автомашинаси келди ва ҳайдовчи менга машинага ўтиришимни айта бошлади. Мен рад этдим, лекин у қўпол тарзда менга автомобилга ўтиришимни айтди. Мен уни ходим, менга ҳеч нарса қилмайди, деб ўйладим. Машинага ўтирганимдан сўнг, у бизни жуда узоққа олиб кетди, машинани ўчириб, бизга тегажоғлик қила бошлади”, деган 14 ёшли қиз.
Қизнинг қўшимча қилишича, шундан сўнг унинг акаси геолокация билан ўша жойга етиб борган.
“Ўзбекистон ППХ ходими менинг 14 ёшли синглим билан тунги соат 01:00 да тоғда, машина ичида бўлган. Нима билан шуғулланганини билмайман. Ёрдам беришингизни, бу воқеани кенг оммага ёйишингизни сўрайман. Бу ақлга сиғмайдиган ҳолат. Қиз ҳали 14 ёшда”, деган унинг акаси.
Шунингдек, у видео ва телефон суҳбатини ёзиб олганини, ходим унга таҳдид қилганини айтмоқда. Қолаверса, у можаро вақтида ходим унинг қўлини жароҳатлаганини таъкидламоқда.
ИИВ Жамоат хавфсизлиги департаменти ҳодиса юзасидан маълумот бериб, тергов бошланганини очиқлаган.
“Ички ишлар вазирлигининг Ички хавфсизлик бўлими прокуратура билан биргаликда ушбу ҳодиса бўйича дарҳол тергов бошлади. Ҳодисанинг барча иштирокчилари ва ҳолатлари аниқланди. Нашрларда тилга олинган ходим лавозимидан четлаштирилди. Агар даъво қилинган ҳаракатлар тасдиқланса, уларнинг ҳаракатлари жиноий жавобгарликка тортилади”, дейилади хабарда.
Қўшимча қилинишича, тергов натижалари кейинроқ эълон қилинади.
