Қирғизистоннинг Ноокат тумани Кўк-Бел қишлоғида яшовчи 20 ёшли қизнинг жасади чорва молхонасидан осилган ҳолда топилди. Бу ҳақда “Kaktus Media” хабар берди.
Маълум қилинишича, воқеа ҳақида 2026 йил 20 февраль куни 112 хизмати орқали Ноокат тумани ички ишлар бўлимига хабар келиб тушган. Шундан сўнг, ҳодиса юзасидан суриштирув ишлари бошланган ҳамда суд-тиббий экспертизаси тайинланган.
Марҳуманинг қариндошлари эса расмий равишда илгари сурилаётган ўз жонига қасд қилиш тахминига ишонмаётганини билдирмоқда. Уларнинг айтишича, қиз бир йил аввал турмушга чиққан ва турмуш ўртоғи томонидан мунтазам равишда калтакланаётганидан шикоят қилиб келган. Қариндошлари унинг танасида, хусусан орқа ва буйрак соҳасида гематомалар бўлганини даъво қилган.
Шунингдек, яқинларининг сўзларига кўра, қиз фожиадан бироз олдин ҳомиладор эканини маълум қилган. Ижтимоий тармоқларда тарқалган хабарларда эса у ўлимидан олдин онасига эри томонидан доимий калтакланаётгани ҳақида ёзиб, уни олиб кетишини сўрагани айтилади. Она хабарни олганидан тахминан уч соат ўтиб қизининг уйига борганида, у ерда одамлар тўпланганини кўрган ва қизининг вафоти ҳақида эшитган.
Айни вақтда ҳолат юзасидан тергов ҳаракатлари давом этмоқда.
