Қозоғистон Ички ишлар вазирлиги боксчи Дмитрий Биволнинг собиқ рафиқаси Екатерина Биволни қидирувга берди. Бу ҳақда “Tengrinews” вазирлик матбуот хизматига таяниб хабар берди.
Вазирлик ҳодиса юзасидан жиноят иши қўзғатилганини билдирган, бироқ қайси ҳодиса учун экани очиқланмаган. Ҳозирда терговга қадар текширув ҳаракатлари олиб борилмоқда.
Екатерина Бивол олдинроқ ижтимоий тармоққа турли миллат вакиллари ҳақида ҳақоратомуз сўзларни айтган видеони жойлаштирган эди. Ўтган ҳафта Қирғизистонда уни ҳибсга олиш учун ордер чиқарилган. Бишкек шаҳар Ички ишлар бош бошқармаси хабарига кўра, иш Қирғизистон Жиноят кодексининг 330-моддаси (ирқий, этник, миллий ёки минтақалараро адоватни (нифоқ) қўзғатиш) бўйича очилган. Ушбу модданинг жазоси беш йилдан етти йилгача озодликдан маҳрум қилишдир. Кўпчилик фойдаланувчилар аёлнинг хатти-ҳаракатини қоралаб, унинг гаплари ҳурмат ва бағрикенглик тамойилларига зид эканини таъкидлади.
Бундан ҳам олдин у собиқ эрининг оиласи ҳақида номақбул фикрлар билдирган, хусусан, боксчининг онасини “дўзахнинг уруғи” деб атаган.
Қирғизистонда туғилган россиялик профессионал боксчи, енгил вазн тоифасида WBA чемпиони Дмитрий Бивол ва унинг собиқ рафиқаси Екатерина 2007 йилдан бери бирга эди, 2014 йилда турмуш қурган ва бирга ўғил фарзандли бўлган. Эр-хотин 16 йиллик турмушдан кейин 2023 йилнинг июнь ойида ажрашди, аммо жанжал кейинроқ авж олди ва ижтимоий тармоқларда, судда оммавий айбловлар ва ўзаро даъволар билан шу кунгача давом этмоқда. Екатерина Дмитрийни суиистеъмоллик, хиёнат ва молиявий фирибгарликда айблади, у эса унинг хатти-ҳаракатларини ахлоқсизлик деб атади.
