Тегишли ҳуқуқни муҳофаза қилувчи органлар ҳамкорлигида Бўстонлиқ туманида зўравонлик билан шуғулланиб келган икки жиноий гуруҳ фаолиятига чек қўйилди. Бу ҳақда Давлат хавфсизлик хизмати хабар берди.
Аниқланишича, Бўстонлиқ туманида яшовчи икки жиноий гуруҳ ўртасида Чорвоқ сув омбори ҳудудидаги пляжларни куч ишлатиш орқали назоратга олиш, уларни ноқонуний эгаллаш ҳамда таъсир доирасини кенгайтириш масаласида кескин можаро келиб чиққан.
Мазкур можаро оқибатида биринчи жиноий гуруҳ аъзолари иккинчи гуруҳ вакилларини дўппослаб, унга тан жароҳати етказган. Билдирилишича, ҳолат юзасидан биринчи жиноий гуруҳнинг тўрт нафар аъзоси процессуал тартибда қўлга олиниб, уларга нисбатан Жиноят кодексининг 277-моддаси (безорилик) билан жиноят иши қўзғатилган ҳамда қамоқ эҳтиёт чораси қўлланилган.
Бироқ воқеалар шу билан якун топмаган. Маълум бўлишича, жорий йилнинг 16 июнь куни иккинчи жиноий гуруҳ аъзолари қасос олиш мақсадида биринчи гуруҳнинг қўлга олинмай қолган вакилига кастет ва бейсбол битаси билан ҳужум қилиб, унга оғир тан жароҳати етказган. Олиб борилган тезкор тадбирлар натижасида жорий йилнинг 19 июнь куни мазкур гуруҳнинг уч нафар фаол аъзоси ҳамда воқеага алоқадор яна олти нафар шахс, жами тўққиз киши процессуал тартибда ушланган.
Шунингдек, тергов ҳаракатлари давомида иккинчи жиноий гуруҳ вакилларидан бирининг Instagram ижтимоий тармоғи орқали диний экстремистик оқим ғояларини тарғиб қилувчи материалларни тарқатиб келгани ҳам аниқланиб, ушбу ҳолат белгиланган тартибда расмийлаштирилган.
Билдирилишича, айни пайтда мазкур ҳолат юзасидан тергов ҳаракатлари давом эттирилмоқда.
