Исроил ҳарбийлари Ғазо шимолига дрондан зарба берди. Ҳужум оқибатида ўтин тераётган икки нафар фаластинлик бола ҳалок бўлди. Шундай қилиб, АҚШ воситачилигида сулҳ битими имзоланганидан буён ўлдирилган ғазоликлар сони 483 нафарга етди.
Ғазо Соғлиқни сақлаш вазирлиги маълумотига кўра, ҳолат Бейт Лаҳия ҳудудида содир бўлган. Дрондан берилган зарба натижасида 13 ёшли Салман аз-Завора ва унинг 15 ёшли амакиваччаси Муҳаммад аз-Заворалар вафот этган.
Бундан бир неча кун аввал икки нафар чақалоқ совуқ уриши натижасида оламдан ўтганди. Фаластин соғлиқни сақлаш мулозимларига кўра, қиш мавсуми бошланганидан буён совуқ уриши оқибатида вафот этган болалар сони 10 нафарга етган.
Исроил томонидан жорий этилган қамал сабаб қиш мавсуми ғазоликлар учун оғир келди. Қишлаш учун зарур воситалар, жумладан, вақтинчалик бошпаналар етишмаслиги боис гуманитар инқироз янада чуқурлашган. Аҳолининг катта қисми иситиш воситаларисиз эскирган чодирларда яшашга мажбур бўляпти.
Фаластин соғлиқни сақлаш вазирлиги маълумотларига кўра, ўт очишни тўхтатиш бўйича сулҳ кучга кирган 2025 йил 11 октябрдан буён ҳалок бўлган ғазоликлар сони 483 нафарга, жароҳатланганлар эса 1 313 нафарга етган. Тиббий бригадалар шу давр ичида 713 жасадни вайроналар остидан олиб чиққан.
