Италиядаги хусусий музейдан машҳур импрессионист рассомларнинг учта картинаси ўғирлаб кетилди. Бу ҳақда The Guardian хабар берди.
Ўғрилик Маняни-Рокка жамғармаси музейида 22 мартдан 23 мартга ўтар кечаси содир этилган. Ўғирланган асарлар қаторида Пьер Огюст Ренуарнинг “Балиқлар” асари, Пол Сезаннинг қалам ва акварелда чизилган “Гилосли натюрморт”i ҳамда Анри Матисснинг “Айвондаги одалиска” номли акварели бор.
Таъкидланишича, юзини капюшон билан тўсиб олган ўғрилар кириш эшигини бузиб, атиги уч дақиқадан сўнг санъат дурдоналари билан бирга боғ орқали қочиб кетган. Музей вакиллари бу олдиндан режалаштирилган жиноят эканини айтиб, видеокузатув тизими ва қўриқлаш хизмати тезкор аралашгани сабаб ҳолат янада оғирлашмаганини билдирган. Ўғирланган асарларнинг тахминий қиймати миллионлаб еврога баҳоланмоқда. Ҳозирда тергов ҳаракатлари олиб борилмоқда.
Санъатшунос ва коллексионер Луиджи Маняни номидаги фондда Титиан, Дюрер, Рубенс ва Гоя каби машҳур рассомларнинг асарлари ҳам сақланади. Ушбу хусусий музей Италиядаги энг муҳим санъат тўпламларидан бири ҳисобланади.
