Кеча, 25 июль куни Қозоғистон Президенти Қосим-Жомарт Тўқаев Россия Омск шаҳрига ташрифи чоғида Владимир Путинга Шоқан Валихонов ва Фёдор Достоевский тасвирланган суратни совға қилди. Бу ҳақда Оқўрда матбуот хизмати хабар берди.
“Давлат раҳбари Шоқан Валихонов ва Фёдор Достоевский тасвирланган суратни тақдим этди”, дейилади хабарда.
Маълумот учун, Шоқан Валихонов (тўлиқ исми: Муҳаммад-Ҳанафия Чингизович Валихонов; 1835–1865) – қозоқ халқининг буюк олими, шарқшунос, тарихчи, этнограф, географ ва фольклоршунос бўлиб, Марказий Осиё халқлари тарихи ҳамда маданиятини тадқиқ этишга катта ҳисса қўшган.
Абилхайрхон ва Абилайхон авлодидан бўлган Валихонов Омскдаги кадет корпусида таҳсил олган. У ерда рус ва жаҳон адабиёти, географик ҳамда тарихий фанларни чуқур эгаллаб, рус интеллигенцияси, жумладан, машҳур ёзувчи Фёдор Достоевский каби зиёлилар билан мустаҳкам дўстлик алоқаларини ўрнатган.
Олимнинг энг муҳим илмий ишларидан бири – у қирғиз халқининг машҳур “Манас” эпосини биринчилардан бўлиб ёзиб олган ва рус тилига таржима қилиб, илмий муомалага киритган. Шунингдек, 1858–1859 йилларда ўша даврда европаликлар учун ёпиқ ва ниҳоятда хавфли бўлган Шинжонга савдогар қиёфасида яширинча саёҳат қилган. У ердан Шарқий Туркистоннинг географияси, тарихи, иқтисоди ва этнографиясига оид жуда қимматли ва ноёб маълумотларни тўплаб қайтган.
Фёдор Михайлович Достоевский (1821–1881) эса жаҳон адабиётининг энг буюк ва таъсирли намояндаларидан бири, рус ёзувчиси, публицисти ва файласуфидир. Унинг асарлари инсон руҳиятининг энг тўридаги ва мураккаб қатламларини, эътиқод, ахлоқ, эркинлик ҳамда эзгулик ва ёвузлик ўртасидаги курашни чуқур таҳлил қилиши билан таниқли.
Тарихий маълумотларга кўра, Валихонов ва Достоевскийнинг дўстлиги 1854 йилда айнан Омскда бошланган ва узоқ йиллар давом этган. Улар тез-тез Омск, Семипалатинск ва Санкт-Петербург шаҳарларида учрашиб турган.
