Ингушетияда Сунжа дарёсида оқиб кетган 8 ёшли Хизир Дербичевни қидириш ишлари якунланди. Бир неча кун давом этган қидирув-қутқарув операциясидан сўнг боланинг жасади топилди. Бу ҳақда “Mirmol.ru” хабар берди.
Республика ҳукумати маълумотига кўра, Хизирнинг жасади 22 июнь куни маҳаллий вақт билан соат 16:50 да топилган. Шундан сўнг Фавқулодда вазиятлар хизмати қидирув-қутқарув ишлари расман якунланганини эълон қилган. Ҳодиса тафсилотларига аниқлик киритилмоқда.
Фожиа 15 июнь куни содир бўлган. Оммавий ахборот воситалари маълумотларига кўра, Хизир Сунжа дарёси бўйида икки нафар дўсти билан бўлган. Болалардан бири – Адам сувга тушиб кетган ва дарахт шохи ёки илдизидан ушлаб қолишга муваффақ бўлган.
Хизир дўстига ёрдам бериш учун сувга ташланган, аммо кучли оқимни енголмай, сув уни оқизиб кетган. Учинчи бола катталарни чақириш учун югурган ва натижада Адамни қутқариб қолган.
Бу воқеа жамоатчиликда катта акс-садо берган. Кўпчилик Хизирни кичик қаҳрамон деб атаган. Одамлар унинг атиги 8 ёшида бўлишига қарамай, катталардек жасорат кўрсатиб, дўстини қутқаришга уринганини таъкидлаган.
Гувоҳларнинг сўзларига кўра, Хизир дарёга ташланишидан олдин: “Қани, биз эркакмиз-ку, қани уни қутқарайлик”, деган.
Хизирни қидириш ишларида минглаб одамлар иштирок этган. Қутқарувчилар, кўнгиллилар ва маҳаллий аҳолидан ташқари, Чеченистон, Доғистон, Шимолий Осетия, Кабарда-Балқария ҳамда Қорачай-Черкесиядан келган кўнгиллилар ҳам операцияга жалб қилинган.
Қидирув иштирокчилари Сунжа дарёсининг ўзани, қирғоқлари ва атроф ҳудудларни текширган. Бироқ ёмғирлардан кейин сув сатҳининг кўтарилиши ва оқимнинг кучайиши ишларни анча мураккаблаштирган.
