Украина россиялик олигарх Роман Абрамовичга тегишли бўлган Англиянинг “Челси” футбол клуби сотилишидан тушган 2,4 миллиард фунт стерлинг (тахминан 3,34 миллиард доллар) маблағни нафақат гуманитар, балки ҳарбий мақсадларда ҳам ишлатишни режалаштирмоқда. Бу ҳақда Украина Президенти Владимир Зеленский “The Guardian” нашрига берган интервьюсида маълум қилди.
Унинг айтишича, у Буюк Британия Бош вазири Кир Стармер билан учрашувда ушбу маблағлардан фойдаланиш масаласини кўтарган. Бироқ бу масала юзасидан Буюк Британия билан ҳали якуний келишувга эришилмаган.
Ҳозирда Британия ҳукумати “Челси” клуби сотилишидан тушган маблағни Украинадаги гуманитар эҳтиёжлар учун йўналтиришни режалаштирмоқда. Бироқ Зеленский бу маблағларни ҳарбий йўналишга, хусусан, ҳаво мудофаа тизимларини харид қилишга сарфлашни таклиф қилган.
Унинг айтишича, ушбу маблағлар Украина энергетика инфратузилмасига қилинган ракета ҳужумларига қарши ҳимояни кучайтириш, шунингдек, АҚШдан қўшимча ҳаво мудофаа тизимларини сотиб олиш имконини беради ва мамлакатнинг ракетага қарши салоҳиятини сезиларли даражада оширади.
Шунингдек, Зеленский яқинда Киевда Роман Абрамович билан учрашув ўтказганини ва унга “Бизга сизнинг пулингиз керак”, деганини ҳам айтган.
Маълумот учун, 59 ёшли россиялик миллиардер Роман Абрамович Англиянинг “Челси” футбол клубини 2003 йилда тахминан 140 миллион фунт стерлинг эвазига сотиб олган. 2022 йилда Украинадаги уруш ортидан Буюк Британия ҳукумати томонидан россиялик тадбиркорларга қарши санкциялар жорий этилгач, 2022 йил май ойида Абрамович “Челси”ни америкалик тадбиркор Тодд Боэли бошчилигидаги инвесторлар консорциумига 4,25 миллиард фунт стерлингга сотган.
