Ўзбекистонда фуқароларга Мажбурий ижро бюросига (МИБ) бормасдан, ўзларига нисбатан юритилган ижро ишига асос бўлган ҳужжатлар билан онлайн танишиш имконияти яратилди. Бу ҳақда Бош прокуратура хабар берди.
Маълум қилинишича, янги электрон хизмат Ягона интерактив давлат хизматлари портали — my.gov.uz орқали тақдим этилади. Хизматдан фойдаланиш учун мй.гов.уз порталига кириб, “Жарималар” бўлимидан “Ижро ҳужжатлари (МИБ)” хизматини танлаш керак.
Мазкур хизмат орқали фуқаролар ўзларига тегишли ижро ишининг асосини ташкил этувчи ҳужжатлар билан масофадан танишиши мумкин. Бунинг учун МИБ бўлимларига шахсан бориш талаб этилмайди.
Аввалроқ президентнинг 2026 йил 30 мартдаги фармони билан суд ҳужжатлари ва бошқа органлар ҳужжатларини ижро этиш тизимини рақамлаштириш ҳамда унинг самарадорлигини ошириш бўйича қўшимча чора-тадбирлар белгиланганди.
Фармонга кўра, 1 майдан алимент қарздорлиги мавжуд шахсларнинг айрим йирик битимларни амалга ошириши, молия-кредит ва давлат хизматларидан фойдаланишини қарздорлик тўлиқ бартараф этилгунига қадар чеклаш тартибини жорий этиш назарда тутилган.
Шунингдек, муаммоли кредитлар бўйича ижро ҳужжатлари асосида юзага келган мажбуриятларни ундириш учун МИБга қўшимча 400 та ихтисослаштирилган давлат ижрочиси штатини ажратиш белгиланган.
