Ижтимоий тармоқларда тарқалган “ОИТС одамнинг қони шприц билан юборилган бананлар тарқалмоқда” мазмунидаги хабарларга шифокор изоҳ берди.
Қайд этилишича, бананлардан қизил суюқлик ёки масса чиқиши мумкин. Бу тропик ўлкаларда ушбу мевани асосий зарарловчи ҳисобланган замбуруғ ёки бактериал касаллик натижасида юз беради. Бундай бананни еб бўлмайди.
“Бананнинг ичига ростдан ҳам қон юборишадими? Ундай қилиб ўтиришмайди, шунча қонни қаердан олади деган саволни ўзингизга бериб кўринг. Шундай бўлган тақдирда ҳам у сизга юқмайди. Шу пайтгача ОИВ вируси овқат ҳазм қилиш йўли орқали юққани кузатилмаган”, деган мутахассис.
ОИВ фақатгина ҳимояланмаган жинсий алоқа, тўғридан тўғри қон билан боғлиқ амалиётлар ёки онадан болага ўтиши мумкинлиги таъкидланди. Шунингдек, бананга қон юборилган бўлса ҳам, унинг пўчоғи тешилгани сабаб тезда чириши, вирус эса ташқи муҳитда узоқ яшай олмаслиги билдирилди.
“Бу хабарлар шунчаки фейк. Фақат Ўзбекистонда эмас, бутун дунёдаги кўплаб давлатларда ҳам бундай хабарлар тарқалади, асосан, банан етиштирмайдиган ва уни импорт қиладиганларида”, дейилади изоҳда.
