Ўзбекистонга 2026 йил январь—февраль ойларида 156,9 миллион долларлик гўшт ва гўшт маҳсулотлари импорт қилинди. Бу ҳақда Божхона қўмитаси сайтида маълумот берилди.
Гўшт импортининг асосий улуши қорамол гўшти ҳиссасига тўғри келган. Икки ой давомида хориждан умумий қиймати 120 миллион долларлик 25,9 минг тонна мол гўштисотиб олинган. Таққослаш учун, 2025 йил мос давридаги жами қиймат 68,3 миллион долларни ташкил этган (17,3 мин тонна). Бир йил ичида мол гўшти импортидаги фарқ икки бараварга яқинлашган.
Ўтган икки ойда 13,7 миллион долларлик товуқ гўшти импорти амалга оширилган. 2025 йил январь—февралида бу кўрсаткич 11,4 миллион доллар бўлган.
Ўз навбатида 3,3 минг тонна қўй гўшти импортининг қиймати 8,1 миллион долларни ташкил этган. Ўтган йилнинг дастлабки икки ойида 3,4 минг тонна қўй гўшти 3,4 миллион долларга олиб келинганди. Бунда миқдорда бир оз қисқариш, нархда эса кескин ўсиш кузатилганини кўриш мумкин.
Январь—февраль ойларида 5,9 миллион долларлик гўшт субмаҳсулотлари импорт қилинган (2025 йил мос даврида 2,8 миллион доллар). Шу билан бирга, чет элдан 4,6 миллион долларлик консерваланган гўшт маҳсулотлари харид қилинган. Мазкур рақам 2025 йил мос давридагидан 1,8 миллион долларга кўп.
Икки ой ичида 521,7 минг долларлик ўрдак гўшти импорт қилинган ва бу қиймат ўтган йил мос даврига нисбатан қарийб 35 бараварга ошган.
