Якунланган 2025 йилда Хитой Россиядан олтин импортини 800 фоизга ошириб, 25,3 тоннага етказди. Бу ҳақда “РИА Новости” агентлиги Хитой божхона хизмати маълумотига таяниб хабар берди.
Агентлик хабарига кўра, ўтган йил якунлари бўйича Россия Хитойга олтин етказиб берувчилар орасида еттинчи ўринни эгаллаган. Пекиннинг бу борадаги асосий таъминотчиси Швейцария бўлиб, у Хитойга 25,73 миллиард долларлик олтин сотган. Кейинги поғоналарни Канада (11,06 млрд), ЖАР (9,42 млрд), Австралия (8,77 млрд) ва Қирғизистон (4,95 млрд) банд этган.
Хитой олтин бозорининг энг йирик харидори ҳисобланади. У савдо урушлари ва глобал беқарорлик фонида ушбу қимматбаҳо металл импортини кескин оширган. Францияда жойлашган Societe Generale молия институти ҳисоб-китобларига кўра, 2025 йилда мамлакат жами ҳисобда 250 тонна олтин сотиб олган. Бу бутун дунё марказий банклари томонидан амалга оширилган барча харидларининг учдан бир қисмидан ҳам кўпдир.
“Технологии доверия” консалтинг компанияси ҳисоб-китобларига кўра, Россияда 2025 йилда олтин қазиб олиш 4,5 фоизга ошиб, 345 тоннага етган. 2024 йилда эса бу кўрсаткич 330 тоннани ташкил қилган.
Бироқ Украинага қарши кенг кўламли уруш бошланганидан буён рус олтинини хорижга экспорт қилиш кескин камайган. 2022 йили мамлакат 261 тонна олтин сотган бўлса, 2024 йилга келиб бу кўрсаткич 158 тоннагача тушиб кетган. Бошқача айтганда, экспорт миқдори 40 фоизга қисқарган.
Россия Молия вазирлиги маълумотларига кўра, 2022-2025 йиллар давомида Миллий фаровонлик жамғармасидаги олтин ҳажми 71 фоизга камайган. Бунга маблағларнинг “бюджетдаги тешикларни ямаш” учун фойдаланилгани, бошқача айтганда, муттасил ошиб бораётган ҳарбий харажатлар сабаб бўлган.
