Жаҳон соғлиқни сақлаш ташкилоти (ЖССТ) ҳантавирус билан касалланиш ҳолатлари ортиши мумкинлиги ҳақида огоҳлантирди, Нидерландияда эса иккита янги тасдиқланган ҳолат ҳақида хабар берилди. Бу ҳақда кеча, 7 май куни ЖССТ раҳбари Тедрос Аданом Гебрейесус Женевадаги матбуот анжуманида сўз очди.
“Ҳантавирус билан боғлиқ бешта ҳолат тасдиқланди, яна учтаси текширилмоқда. Улар орасида круиз лайнерининг вафот этган йўловчилари ҳам бор. Андес вируси (лайнер йўловчиларида тасдиқланган вариант) учун инкубация даври олти ҳафтагача давом этишини ҳисобга олсак, касалланиш ҳолатлари яна кўпайиши мумкин”, дейди у.
Унинг баёнотидан кўп ўтмай, Нидерландияда MV Hondius круиз лайнеридан эвакуация қилинган яна икки кишида ҳантавирус ташхиси тасдиқлангани маълум бўлди.
“Бу пандемиянинг бошланиши эмас”, дейди ЖССТнинг эпидемия ва пандемияларга тайёргарлик кўриш ва уларнинг олдини олиш бўлими директори Мария ван Керкхове.
Ташкилотнинг ҳисоблашича, ваҳима қилишга асос йўқ ва ҳозирги вазият олти йил олдинги коронавирус пандемияси давридаги ҳолатдан фарқ қилади.
