Apple ва Google компаниялари ўз фойдаланувчиларига киберхавф тўғрисида билдиришномалар юборганини маълум қилди. Бироқ ҳужумларнинг тафсилотларини — уларнинг табиати, кўлами ёки тахминий ижрочилари ҳақида ҳеч нарса ошкор қилмаган. Компания фақат ҳозиргача 150 дан ортиқ мамлакатдаги фойдаланувчилар огоҳлантирилганини қайд этди.
Google эса 3 декабрь куни Intellexa жосуслик дастури орқали амалга оширилган ҳужумлар нишонига айланган барча маълум фойдаланувчиларни огоҳлантирганини билдирди.
Компания маълумотига кўра, гап “бир неча юзлаб аккаунтлар” ҳақида бормоқда. Улар Покистон, Қозоғистон, Ангола, Миср, Ўзбекистон, Саудия Арабистони ва Тожикистонда аниқланган.
Citizen Lab тадқиқотчиси Жон Скотт-Рейлтоннинг таъкидлашича, киберхавфлар ҳақида бундай огоҳлантиришлар хакерларнинг ишини қийинлаштиради, чунки улар потенциал қурбонларни хабардор қилади.
Шунингдек, бундай огоҳлантиришлар кўпинча терговлар учун сабаб бўлади. Хусусан, Европа Иттифоқида шундай билдиришномалар сабабли суриштирувлар бошланган — чунки юқори мартабали амалдорлар ҳам жосуслик дастурлари ёрдамида кузатув нишонига айланган.
