Мексиканинг Гуанахуато штати Саламанка шаҳрида жойлашган футбол майдонида 25 январь куни отишма юз берди. Оқибатида камида 11 киши ҳалок бўлди, яна 12 киши турли даражадаги жароҳатлар олди. Бу ҳақда BBC хабар берди.
Гувоҳларнинг сўзларига кўра, бир неча автомобилда келган қуролланган шахслар Лома де Флорес даҳасидаги Cабанас футбол майдонига бостириб кирган ва у ерда тўпланган одамларга қарата ўт очган. Ўша пайтда маҳаллий клублар ўртасидаги ўйиндан сўнг кўплаб оилалар стадионда ҳордиқ чиқараётган бўлган. Қурбонлар орасида бир аёл ва бир бола борлиги тасдиқланган.
Воқеа пайтида яқин атрофда бўлганларнинг сўзларига кўра, ҳужум пайтида 100 дан ортиқ ўқ овози эшитилган. Ҳозирда маҳаллий ва федерал хавфсизлик кучлари мазкур қонли воқеа юзасидан тергов ишларини олиб бормоқда. Мазкур фожиадан бир кун олдин шаҳарда беш киши ўлдирилиб, бир киши ўғирлаб кетилган эди.
Жиноятчилик ва гуруҳлар ўртасидаги рақобат
Гуанахуато штати 2025 йилда Мексикада қотилликлар сони бўйича энг юқори кўрсаткични қайд этган. Штатда ёнилғи ўғрилиги, наркотрафик ва товламачилик билан шуғулланувчи жиноий гуруҳлар ўртасидаги тўқнашувлар кескинлашган. Жиноятчилар кўпинча давлатга қарашли Pemex компаниясининг нефть қувурларини тешиш ва ёнилғи ташувчи юк машиналарини талаш билан шуғулланади.
Таҳлилчиларнинг таъкидлашича, Саламанка шаҳридаги (бу ерда йирик Pemex заводи жойлашган) кўплаб шафқатсиз жиноятлар ортида “Халиско янги авлод” ва Санта Роса де Лима картеллари ўртасидаги рақобат ётибди.
“Афсуски, ҳокимиятни бўйсундиришга уринаётган жиноий гуруҳлар бор, лекин улар бунга ҳеч қачон эриша олмайди”, деди Саламанка мэри.
Мексика ҳукумати 2025 йилда мамлакатда қотиллик даражаси 2016 йилдан буён энг паст кўрсаткичга (ҳар 100 минг аҳолига 17,5 та) тушганини даъво қилмоқда. Бироқ таҳлилчилар бу рақамлар реал вазиятни тўлиқ акс эттирмаслигини таъкидлади.
АҚШ давлат департаменти 2025 йилда “Халиско янги авлод” гуруҳини “хорижий террорчилик ташкилоти” деб эълон қилган бўлса, яқинда Санта Роса де Лимаъга қарши санкциялар жорий этди. АҚШ президенти Дональд Трамп героин, фентанил ва кокаин каби гиёҳванд моддаларни мамлакатга олиб кираётган картелларга қарши курашни устувор вазифа қилиб белгилаган. Трамп аввалроқ картеллар Мексикани бошқармоқда дея даъво қилиб, наркотеррорчиларга қарши қуруқликда зарбалар бериш билан таҳдид қилган эди.
Ҳозиргача АҚШ денгиз орқали наркотик ташиётган кемаларга камида 36 марта зарба берган, оқибатда 125 киши ҳалок бўлган. Ҳуқуқшунослар ва Трампнинг танқидчилари ушбу операцияларнинг қонунийлигини шубҳа остига олмоқда.
Ўтган ҳафтада Мексика президенти Клаудия Шейнбаум 37 нафар “юқори даражадаги” гумондорни АҚШга топширди. Маҳаллий ОАВ буни Мексика ҳукуматининг Вашингтон билан ҳамкорлик қилиш орқали Трампнинг Мексика ҳудудида бир томонлама ҳарбий зарбалар йўллашининг олдини олишга уриниши сифатида баҳоламоқда.
