Афғонистон ва Покистон ўртасидаги чегарадаги тўқнашувлар оқибатида 70 нафардан ортиқ афғон ҳарбий хизматчиси ҳалок бўлди. Бу ҳақда Покистон хавфсизлик органларидаги манбаларга таяниб, “Geo TV” хабар берди.
Нашр этилган хабарга кўра, камида 72 нафар афғон ҳарбийси ҳалок бўлган, 120 дан ортиқ жангчи жароҳат олган.
Хабарда таъкидланишича, Покистон кучлари 30 дан ортиқ афғон танки, артиллерия қуроллари ва бронетранспортёрларини йўқ қилган, шунингдек 12 та чегара постига зарба берган ҳамда яна 5 тасини назоратга олган.
Бундан ташқари, Покистон ҳарбий-ҳаво кучлари Афғонистоннинг Нангарҳор вилоятидаги йирик ўқ-дорилар омборига авиазарбалар берган. Бомбардимон натижасида омбор тўлиқ йўқ қилинган.
Икки давлат кучлари ўртасидаги янги тўқнашувлар бугун, 27 февраль кунига ўтар кечаси Афғонистоннинг олти вилоятида бошланган. Жанглар Нуристон, Хост, Пактия ва Пактика вилоятларининг чегара ҳудудларида, Қобул томонидан расман тан олинмаган Дюранд чизиғи яқинида давом этмоқда.
Кейинчалик Покистон авиазарбаларидан сўнг Афғонистон кучлари шарқий вилоятлар ҳудудида жавоб операциясини бошлагани маълум бўлган. Хусусан, афғон ҳарбийлари Нангарҳор ва Кунар вилоятларида 15 та покистонлик чегара постини йўқ қилгани ва 8 та позицияни эгаллагани билдирилган.
