Афғонистоннинг Кобул марказида жойлашган тарихий Ариана кинотеатри замонавий савдо маркази қуриш учун бутунлай бузиб ташланди. Бу ҳақда CNN хабар берди.
Кинотеатр илк бор 1963 йилда томошабинлар учун ўз эшикларини очган. Уни бузиш ишлари 2025 йил 16 декабрда бошланган.
Бу орқали нафақат ғишт ва цементдан иборат бино, балки барча қийинчиликлар ва жиддий хавфсизлик муаммоларига қарамай санъатини тарк этмаган афғон кино ихлосмандлари ҳам йўқ қилинмоқда. Афсуски, тарихий Афғонистонга оид барча белгилар барбод этилмоқда, деди афғон кинорежиссёри ва актёр Амир Шоҳ Талаш.
“Толибон” Афғонистонда ҳокимиятни эгаллаганидан сўнг Францияда яшаб келаётган Талаш Ариана кинотеатрининг бузилгани “жуда оғриқли ва қайғули хабар” эканини айтди. У 2004-йилдан буён Афғонистон кино саноатида фаолият юритиб келган.
2021 йилда АҚШ ва НАТО қўшинларининг чиқиб кетишидан сўнг ҳокимиятни қўлга олган “Толибон” кино ва мусиқа каби кўнгилочар фаолиятнинг аксар турларини тақиқлади. Шунингдек, барча кинотеатрларни ёпди. 2025 йил 13 май куни Афғонистон Кино бошқармаси фаолияти тугатилди. Шаҳар марказидаги тирбанд чорраҳада жойлашган Ариана ёпилди ва унинг тақдири узоқ вақт ноаниқ бўлиб қолди. Кейинчалик Кобул расмийлари замонавий пештоқи билан танилган кинотеатр ўрнида янги савдо мажмуаси қуришга қарор қилди.
Кинотеатрлар ҳам ўзига хос тижорий фаолият ҳисобланади. Бу ҳудуд тўлиқ савдо зонаси бўлиб, у ерда яхши бозор яратиш имконияти бор, деди Кобул муниципалитети вакили Ниаматуллоҳ Баракзай.
Ариана кинотеатри 2004-йилда Франция ҳукумати кўмагида қайта тикланган эди. Бу ерда айниқса ҳинд ва жангари фильмлар машҳур бўлган. Шунингдек, маҳаллий кино саноати жонланиши ортидан афғон фильмлари ҳам намойиш этила бошланган.
