“Толибон” ҳаракатининг Молия вазирлиги 22 ноябрь куни Афғонистонда Жаҳон банки қайта очилганини ва ташкилот фаолияти тиклаганини маълум қилди. Бу ҳақда Afghanistan International хабар берди.
Жаҳон банки бу борада ҳали расмий изоҳ бермаган, бироқ “Толибон” ташкилот пудратчи компанияларнинг 45 миллион доллар миқдоридаги қарзларини тўлаб беришини маълум қилган. Молия вазирлигининг баёнотида айтилишича, Жаҳон банки 2021 йил август ойидан олдин ҳужжатлари қайта ишланиб, якунланган пудрат лойиҳалари ва компанияларга пулларни тўлаб бериш мажбуриятини олган.
Афғонистон Ислом Республикаси қулаб, ҳокимият “Толибон” назоратига ўтганидан сўнг, Жаҳон банки мамлакатдаги фаолият усулини ўзгартирган эди. Яъни ўшандан бери банк “Толибон” назоратидаги давлат идоралари билан тўғридан тўғри ишлашни тўхтатганди.
Хусусан, ёрдам ва молиялаштириш асосан ЮНИСЕФ, Жаҳон озиқ-овқат дастури ва Афғонистонни қайта қуриш жамғармаси каби халқаро ташкилотлар орқали йўналтирилган. Халқаро ёрдамнинг асосий мақсади ёрдамнинг бевосита назорати “Толибон” қўлида бўлмасдан, аҳолига етиб боришини таъминлаш эди.
Тўрт босқичда тўлаш
Эндиликда эса “Толибон” Молия вазирлиги Жаҳон банки билан шартнома тузган бир қатор лойиҳа ва компанияларнинг пулларини қайтариш жараёни бошлангани, уларнинг ҳужжатлари Жаҳон банки мониторинг гуруҳи ва Молия вазирлиги томонидан кўриб чиқилганини маълум қилган.
“Толибон”га кўра, қарздорликлар Молия вазирлиги билан келишилган ҳолда тўрт босқичда тўланади:
- биринчи босқичда 9,3 миллион доллар маблағ тўғридан тўғри хорижий пудратчи компанияларга тўланиши белгиланган;
- иккинчи босқичда эса Жаҳон банки 16,8 миллион долларни “Толибон” Молия вазирлиги орқали пудратчи компанияларга тўлиқ тўлайди.
Молия вазирлиги Жаҳон банки тўловларининг дастлабки икки босқичи амалда бошланганини ва учинчи ҳамда тўртинчи босқичлар ҳам тез орада бошланишини маълум қилган.
