Қашқадарё вилоятида сохта гувоҳнома ва маълумотномалар ясаб, фуқаролар номига йирик миқдорда кредит расмийлаштирган шахслар ашёвий далиллар билан қўлга олинди. Бу ҳақда Қашқадарё ИИБ ахборот хизмати хабар қилди.
Қайд этилишича, Қарши шаҳрида яшовчи фуқаро Р.У. қўриқлаш хизмати ходимининг сохта хизмат гувоҳномаси ҳамда Миллий гвардия ҳарбий қисми номидан иш ҳақи миқдори кўрсатилган қалбаки маълумотномалар тайёрлаш билан шуғулланган. У ушбу сохта ҳужжатлар орқали банк филиали орқали дастлаб бир фуқаро номига 60 миллион сўм, кейинчалик яна 11 киши номига умумий ҳисобда 783 миллион сўм кредит расмийлаштиришга эришган.
Фирибгар навбатдаги “мижози”, наманганлик фуқаро И.Д. номига сохта ҳужжатлар орқали кредит олмоқчи бўлган вақтида ИИБ ходимлари томонидан ўтказилган тезкор тадбирда ушланган. Гумонланувчи ўз кўрсатмасида норасмий бухгалтер бўлиб ишлаганини, танишининг таклифи билан ушбу жиноий йўлга кирганини ва қилмишидан пушаймонлигини билдирган.
Ҳолат юзасидан Жиноят кодексининг 168-моддаси (фирибгарлик) 3-қисми “б” банди ва 228-моддаси (ҳужжатлар, штамплар, муҳрлар, бланкалар тайёрлаш, уларни қалбакилаштириш, сотиш ёки улардан фойдаланиш) 2-қисми “а”, “б” бандлари ҳамда 3-қисми билан жиноят иши қўзғатилган. Жиноят ишлари бўйича Қарши шаҳар судининг ажрими билан айбдор шахсларга нисбатан қамоққа олиш эҳтиёт чораси қўлланган.
Ҳозирда дастлабки тергов ҳаракатлари олиб борилмоқда. Қашқадарё ИИБ мазкур шахслардан жабр кўрганлар бўлса, яқин орадаги ички ишлар бўлимларига ёки 102 қисқа рақамига мурожаат қилишни сўраган.
