АҚШ Хитой армиясига сунъий интеллект чиплари ёрдам беришидан хавотирда бўлишига қарамай, АҚШ Президенти Дональд Трамп бугун, 9 декабрь куни Nvidia H200 чипларини ниҳоят Хитойга сотишга рози бўлди. Бу ҳақда Трамп ўзининг Truth Social ижтимоий тармоғидаги саҳифасида маълум қилди.
Трамп чипларни Хитойга 25 фоизлик бож эвазига сотишга рози бўлган ва Хитой Раиси Си Цзиньпин бу қарорни ижобий қабул қилган. Трампнинг эълони ортидан Nvidia акциялари дарҳол 2 фоизга ошган.
Трампнинг айтишича, H200 маҳсулотлари Хитой ва бошқа давлатлардаги тасдиқланган мижозларга етказилади ҳамда кучли миллий хавфсизлик чораларига риоя этилади. Шу билан бирга, Трамп бу жараён орқали Америка хавфсизлигига путур етмаслигига ишонишини таъкидлади.
“Биз миллий хавфсизликни ҳимоя қиламиз, Америка иш ўринларини яратамиз ва сунъий интеллект соҳасида Америка етакчилигини сақлаб қоламиз. Nvidia’нинг АҚШдаги мижозлари аллақачон ўзларининг юқори даражада илғор “Blackwell” чиплари устида ишлашмоқда, тез орада “Rubin” ҳам чиқарилади. Уларнинг ҳеч бири ушбу келишув таркибига кирмайди. Менинг маъмуриятим доимо Американи биринчи ўринга қўяди”, деб ёзди Президент.
Трамп таъкидлаганидек, АҚШ ҳукуматига тўланиши керак бўлган тўлов “25 фоиз”ни ташкил қилади. Оқ уй расмийси ҳам бу кўрсаткич август ойидаги 15 фоизлик таклифдан юқорилиги билан тасдиқлади.
Маъмурият расмийлари бу қарорни Nvidia’нинг сўнгги “Blackwell” чипларини Хитойга жўнатмаслик ва умуман АҚШ чипларини Хитойга етказиб беришни тўхтатиб қўймаслик ўртасидаги мувозанат деб баҳоламоқда. Уларнинг фикрича, барча чипларни тақиқлаш Huawei компаниясининг Хитойда сунъий интеллект чипларини ишлаб чиқиш бўйича саъй-ҳаракатларини янада кучайтириши мумкин.
Мазкур эълон икки хитойлик эркакнинг Nvidia чипларини контрабанда йўли билан олиб ўтишга урингани ортидан юзага келган. Прокурорларнинг айтишича, Нью-Йоркда яшовчи 43 ёшли Хитой фуқароси Фанюэ Гонг ва Канадада яшовчи 58 ёшли Хитой фуқароси Бенлин Юань Гонконгдаги логистика компанияси ҳамда Хитойдаги сунъий интеллект технологиялари компанияси ходимлари билан тил бириктириб, АҚШ экспорт назоратини четлаб ўтган.
Хитой элчиси эса ўз фуқароларини яшаётган давлат қонун-қоидаларига риоя қилишга чақирган ва АҚШ прокурорларидан, Трампнинг чипларни бож асосида сотиш қароридан келиб чиқиб, уларнинг айбловларини бекор қилишни сўраган.
