Туркия президенти Ражаб Тоййиб Эрдўған Қўшма Штатлар ва Эрон кескинлигини юмшатиш учун ушбу давлат раҳбарлари иштирокида телеконференция ўтказишни таклиф қилди. Бу ҳақда Middle East Eye нашри ўз манбаларига таяниб хабар берди.
Қайд этилишича, мазкур ташаббус Оқ уй раҳбари Теҳронга нисбатан ҳарбий куч қўллаш эҳтимолини истисно қилмаётган бир пайтда илгари сурилган. Нашр манбаларига кўра, Трамп билан телефон мулоқоти чоғида Эрдўған америкалик ҳамкасбини масалага дипломатик ечим топишга чақирган. Шунингдек, расмий Анқара Вашингтон ҳамда Теҳрон ўртасида воситачи бўлишга тайёрлигини маълум қилган.
Турк расмийларига кўра, Трамп Эрдўғаннинг таклифига ижобий муносабат билдириб, уни кўриб чиқишга тайёр эканини айтган. Бироқ Эрон президенти Масуд Пезешкиён Анқаранинг ташаббусига ҳозирча расмий муносабат билдирмаган.
Нашрнинг турк дипломатларига таяниб маълум қилишича, Эрон ўз позициясини шу ҳафта Истанбулга ташриф буюриши кутилаётган мамлакат ташқи ишлар вазири Аббос Ароқчи орқали етказиши мумкин. У туркиялик ҳамкасби Ҳоқон Фидан билан икки томонлама музокаралар ўтказиши айтилмоқда. Туркия ва Эрон бош дипломатлари минтақавий хавфсизлик, Вашингтон ва Теҳрон муносабатларида кескинликни камайтириш каби масалаларни муҳокама қилиши кутиляпти.
Шу билан бир вақтда нашр суҳбатлашган дипломатлар Эрдўғаннинг ташаббуси ҳаётга кўчиб, телеконференция ўтказилган тақдирда ҳам, бу навбатдаги қуролли низонинг олдини олиш учун етарли бўлмаслигидан хавотир билдирган. Бундан ташқари, улар Оқ уйнинг Теҳронга нисбатан сиёсатига Исроил ҳам таъсир ўтказаётганини таъкидлаган. Уларнинг фикрича, яҳудий давлати Эроннинг баллистик ракета дастури ва ядровий тадқиқотларини ўз миллий хавфсизлиги учун жиддий таҳдид сифатида баҳолаб, жараённи тўхтатишга интиляпти.
Дипломатик жараёнлар АҚШ Яқин Шарқда ўз ҳарбий қудратини ошираётган бир вақтда фаоллашди. Президент Дональд Трамп ўзининг Truth Social платформасида Эронга томон “улкан армада” йўл олаётгани, агар келишувга эришилмаса, “шиддат ва шафқатсизлик” билан ҳужум қилиниши ҳақида ёзганди. Шунингдек, у Теҳронни тезроқ музокаралар столига қайтишга чақириб, ядро қуролига эга бўлмаган, барча томонлар учун адолатли ва мувозанатли битим тузиш зарурлигини таъкидлаган.
