Тошкент вилояти Тошкент туманидаги деҳқон бозорида аёлларга шилқимлик қилган ва унга танбеҳ берган фуқароларни ҳақоратлаган эркак 15 суткага қамалди.
Аниқланишича, 1978 йилда туғилган X.Д. 2026 йилнинг 6 апрель куни Тошкент туманидаги “Келес деҳқон бозори” атрофида спиртли ичимлик таъсирида бақир-чақир қилиб, бозор ҳудудидан ўтаётган аёлларга шилқимлик қилган.
Гувоҳлар кўрсатмасига кўра, ҳуқуқбузар ҳатто вояга етмаган қизга нисбатан шаҳвоний ҳаракатларни содир этган. Ушбу ҳолатни кўрган аёллар уни тўхтатишга уриниб, танбеҳ беришган. Шундан сўнг эркак уларни уятли сўзлар билан ҳақорат қилиб, сўкиниб, майда безорилик қилган. Кейинчалик фуқаролар уни ушлаб, ички ишлар органлари ходимларига топширган .
“Қизлар қўрққанидан ўзларини таништирмасдан, ҳолат ҳақида уйдагилари эшитса, уришишини айтиб, кетиб қолишди”, дейди жабрланувчилардан бири.
X.Д. Маъмурий жавобгарлик тўғрисидаги кодекснинг 183-моддаси(майда безорилик) билан айбли деб топилиб, унга нисбатан 15 сутка маъмурий қамоқ жазоси тайинланди.
