Бухорода машинани “права”си йўқлар номига ўтказиб, қоидаларни бузиш мумкинлигини айтган қиз жаримага тортилди. Бу ҳақда вилоят ЙҲХБ матбуот хизмати хабар берди.
“12 баллик жаримага тушиб, ‘права’нгиздан ‘лишат’ бўлмаслигингизнинг энг зўр йўли — машинангиз ‘праваъси бўлмаган одамнинг номида бўлиши экан. Менинг ҳам машинам синглимнинг номида, синглимнинг ‘праваъси йўқ. Мен қанча жаримага тушаверсам, синглимнинг номига жарималар бораверади. Унга балл йиғилади, аммо менинг ‘праваъм ўзимда тураверади, қанча ‘штраф’га тушсам ҳам. Кўрдингизми қанақа ‘умний’ калламан. Шунинг учун машиналарингизни тез ‘права’си йўқ қариндошларингизнинг номига ўтказиб қўйинг”, деган эди у Instagram саҳифасига жойлаган видеода.
Мазкур ҳолат йўл ҳаракати хавфсизлиги бошқармаси ходимлари томонидан тегишли тартибда ўрганилиб, ҳуқуқбузар фуқарога нисбатан Маъмурий жавобгарлик тўғрисидаги кодекснинг 201-1-моддаси билан маъмурий баённома расмийлаштирилди. Тўпланган ҳужжатлар жиноят ишлари бўйича Бухоро шаҳар судида мазмунан кўрилди.
М.А. Маъмурий жавобгарлик тўғрисидаги кодекснинг 201-1-моддаси (қонунчилик ҳужжатларини бажармасликка ёки бузишга омма олдида даъват қилиш) билан назарда тутилган ҳуқуқбузарликни содир этган деб топилди ва унга шу модда билан базавий ҳисоблаш миқдорининг 60 баравари, яъни 24 720 000 сўм миқдорида жарима жазоси тайинланди.
“Ўз Instagram саҳифамга 12 баллик жарималар тўғрисида видео қўйгандим. Қонунни тўғри ўқиб чиқмасдан, нотўғри талқин қилган эканман. Инспектор ходимлари ҳам чақириб тушунтирди. 12 баллик жаримадан қочиб бўлмас экан”, деган айбдор қиз.
У қилмишидан пушаймон эканлигини билдириб, бошқаларга ҳам бундай видео чиқармасликни тавсия этди.
