Туркия Президенти Ражаб Тойиб Эрдўған Москва ва Киевни Истанбулда тўғридан тўғри музокараларга қайтишга чақирди. Кеча, 19 ноябрь куни Анқарада Украина Президенти Владимир Зеленский билан ўтказилган қўшма матбуот анжуманида Эрдўған бу музокаралар “урушнинг ҳар икки томон учун ҳалокатли оқибатларини” ҳисобга олган ҳолда жуда муҳим эканини таъкидлади.
Эрдўғаннинг айтишича, у Зеленский билан учрашувда Истанбул жараёнини “прагматик ва натижага қаратилган ёндашув асосида” давом эттириш зарурлигини таъкидлаган. Туркия раҳбарига кўра, бу музокаралар “урушнинг вайронкор оқибатлари ҳар икки тараф учун кучайган бир пайтда дипломатик саъй-ҳаракатларнинг муҳим босқичи” ҳисобланади. Шунингдек, Анқара барча ҳамкорлардан Истанбул жараёнини қайта йўлга қўйиш учун “конструктив ёндашув” кутаётганини билдирди. Эрдўған қўшимча қилиб, Туркия доимо Москва билан тинчлик таклифларини муҳокама қилишга тайёрлигини ва бу жараёнда АҚШ иштирокини қадрлашини айтди.
Пресс-конференцияда Владимир Зеленский Эрдўғаннинг музокаралар ҳақидаги позициясини қўллаб-қувватлади.
“Биз Туркия дипломатиясининг кучига, унинг Москвада яхши тушунилишини умид қиламиз”, деди у.
Батафсил маълумот бермасдан, у Россиянинг Украинага қарши уруши контекстида “кўплаб жараёнлар” жадаллашганини қайд этди.
“Биз барча фаолият айнан тинчликка, муносиб тинчликка, кафолатланган хавфсизликка қаратилган бўлишини таъминлашга ҳаракат қиляпмиз. Уруш тугаши керак. Тинчликнинг альтернативи йўқ. Россия тушуниши керакки, уруш учун, ўлдиришлар учун ҳеч қандай мукофот бўлмаслиги керак”, деди Украина президенти.
Зеленский, шунингдек, Киев Россия билан асирлар алмашинуви жараёнини тиклаш учун ҳаракат қилаётганини билдирди.
“Умид қиламизки, йил охиригача алмашинувлар қайта бошланади ва кўплаб асирларни қайтариб оламиз. Туркия бу борада бизга катта ёрдам беряпти”, деди у.
Унинг таъкидлашича, Туркияни “кўнгиллилар коалицияси”га, айниқса денгиз хавфсизлиги билан боғлиқ йўналишга жалб этиш жуда муҳим.
“Ҳамма Қора денгизда хавфсизлик ахамиятини тушунади. Бундай хавфсизликни фақат Туркия билан биргаликда таъминлаш мумкин”, дея қўшимча қилди Зеленский.
