Тошкент шаҳрида қўшни давлатдан келган гиёҳванд моддалар етказиб берувчи курьер қарийб 1 кг наркотик воситани топшириш вақтида қўлга олинди. Бу ҳақда Олий суд матбуот хизмати хабар берди.
Қайд этилишича, ҳодиса Тошкентнинг Яккасарой туманида содир бўлган. Қўшни давлатнинг 24 ёшли фуқароси Германиядан жами 1 кг гиёҳванд моддани контрабанда йўли билан Ўзбекистонга олиб кириш учун келган. Ҳуқуқ-тартибот органлари курьерни кузатиб бориб, маҳсулотни топшириш чоғида уни қўлга олган.
У Жиноят кодексининг 246-моддаси 2-қисми (Контрабанда) ва 273-моддаси 5-қисми (Гиёҳвандлик воситалари, уларнинг аналоглари ёки психотроп моддаларни ўтказиш мақсадини кўзлаб қонунга хилоф равишда тайёрлаш, олиш, сақлаш ва бошқа ҳаракатлар қилиш, шунингдек, уларни қонунга хилоф равишда ўтказиш) бўйича айбли деб топилди. Эркак 13 йилга озодликдан маҳрум қилинди.
