2025 йилнинг 2 ноябрь куни Қашқадарё вилоятининг Ғузор туманидаги Шерали қишлоғида мудҳиш қотиллик рўй берди. 38 ёшли фуқаро укасининг 30 ёшли хотинини пичоқлаб ўлдирди. Бу ҳақда “Дарё”га марҳуманинг яқинлари хабар берди.
Тергов ҳужжатида ёзилишича, 1987 йилда туғилган фуқаро Н.О. укаси Қарши шаҳридаги мол бозорга кетганидан фойдаланиб, уйда ёлғиз қолган келини Дилноза Шаймардоновани ошхона пичоғи билан пичоқлаб, ўлдирган.
Гумонланувчи воқеа ҳақида 102 га қўнғироқ қилиб, ўзи хабар берган.
Тергов давомида айбланувчи келини уни сеҳр-жоду қилиб, ўлдиришидан қўрққани оқибатида бу ишга қўл урганини айтган.
Укамнинг бозорга кетишини кутиб туриб, у кетгач, ошхонага кириб, пичоқни олдим ва ҳовлига чиқдим. Ҳовлида келинимиз ҳаммом олдида идиш-товоқларни олаётганини кўриб, ортидан бордим ва икки қўлим билан унинг бўйнидан бўғиб, ерга йиқитдим. Йиқилгач, ортидан пичоқ урдим. Кейин чап елка ва бўйин соҳасига пичоқ санчдим. Шунда пичоқ келинимизнинг бўйнига қадалиб қолди, дея кўрсатув берган гумонланувчи.
Марҳума 2025 йилнинг 31 август куни шу хонадонга келин бўлиб тушган.
Марҳуманинг яқинлари ушбу қотиллик воқеасида бошқа шахсларнинг ҳам иштироки борлигини иддао қилиб, терговдан норози эканини билдирмоқда.
Ҳолат юзасидан гумонланувчига нисбатан Жиноят кодексининг 97-моддаси (қасддан одам ўлдириш) билан жиноий иш қўзғатилиб, ҳибсга олинган.
Аввалроқ ички ишлар вазири ўринбосари Рамазон Ашропов Ўзбекистонда 2025 йилда қотиллик жинояти камайиб, номусга тегиш жинояти ошганини маълум қилганди.
2024 йилда 339 та қотиллик қайд этилган бўлса, 2025 йилда бу кўрсаткич 288 тага тушган. Бироқ номусга тегиш жинояти ўтган йилга нисбатан 359 тадан 381 тага кўпайган, деганди Рамазон Ашропов.
