Таиланд ҳукумати мамлакатга визасиз киришга рухсат берилган хорижликларнинг мамлакатда бўлиш муддатини 60 кундан 30 кунгача қисқартиришни режалаштирмоқда. Бу ҳақда Bangkok Post хабар берди.
Расмийларнинг фикрича, бундай чора Таиландга ноқонуний фаолият учун келган хорижликларга қарши курашда ёрдам беради.
“Бу ўзгариш туризмга таъсир қилмаслиги керак, чунки чет эллик сайёҳлар Таиландда ўртача 21 кундан ортиқ қолмайди. Агар улар 30 кундан ортиқ қолишни истаса, одатдагидек узайтириш учун ариза бериши мумкин”, деди Туризм ва спорт вазирлиги вакили Натрия Тавеевонг.
У янги ҳукумат ҳали шаклланмаганига қарамай, амалдаги муваққат ҳукумат бу ўзгаришларни тасдиқлаш ҳуқуқига эга эканини таъкидлади.
Айни пайтда Таиландга қисқа муддатли ташриф учун виза талаб қилинмайдиган давлатлар рўйхатида 93 та давлат, жумладан, Ўзбекистон ҳам бор. Ушбу мамлакатлардан келган сайёҳларга Таиландда 60 кунгача визасиз бўлиш имконини берувчи дастур 2024 йил ўрталарида сайёҳлар оқимини рағбатлантириш мақсадида жорий этилган.
Таиланд сайёҳлик агентликлари ассоциацияси президенти Тҳанапол Чеевараттанапорннинг айтишича, ассоциация қисқартиришга рози бўлган.
“Ушбу қоидани ўзгартириш 2025 йилдан бери сайёҳлик операторлари томонидан таклиф қилинган, бу хорижий жиноий фаолиятни камайтириш ва соҳа учун хавфсизроқ имижни тарғиб қилишга қаратилган”, деди у.
Маълумот ўрнида, Таиланд ҳукумати Ҳиндистонда ўлимга олиб келувчи нипаҳ вируси тарқалиши сабабли мамлакатнинг асосий аэропортларида тиббий назоратни кучайтирган. Суварнабхуми, Дон Муанг ва Пхукет аэропортларида ушбу давлатдан келаётган йўловчилар текширилмоқда.
Чора-тадбирлар 25 январь куни Касалликларни назорат қилиш департаменти қарори билан жорий этилган. Текширув жараёнига тана ҳароратини ўлчаш ва жойида кўрикдан ўтказиш киради. Инфекция аломатлари аниқланган йўловчилар қўшимча текширув учун карантин муассасаларига юборилади.
