Тошкентдаги хонадонда сифат сертификатига эга бўлмаган 3 миллиард сўмлик дори воситалари яширин омбори ташкил қилингани аниқланиб, бу дорилар савдоси билан шуғулланувчилар фаолиятига чек қўйилди.
Давлат хавфсизлик хизмати Божхона органлари ходимлари билан тезкор тадбир ўтказганида Тошкент шаҳрида яшовчи, 1969 ва 1997 йилларда туғилган ота-бола ўз яшаш хонадонида айланма йўллар орқали олиб келинган дори воситаларини сақлашга мўлжалланган яширин омбор ташкил қилиб, у ерда дори воситаларини сақлаш ҳамда дорихоналарга ўтказиш билан шуғуллангани маълум бўлган.
Тезкор тадбир давомида уларга тегишли хонадон ва автомобиль кўздан кечирилганда, асосан Туркия ва Ҳиндистонда ишлаб чиқарилган “Дюспаталин”, “Новомикс”, “Галвус МЕТ” каби 87 турдаги, жами 133 374 дона, тахминий қиймати 3 миллиард сўмдан ортиқ бўлган дори воситалари ҳамда 50 минг АҚШ доллари, 10,6 миллион сўм ва 150 нафар шахсга тегишли бўлган банк пластик карталари борлиги аниқланиб, ашёвий далил сифатида расмийлаштирилиб олинган.
Ҳозирда дори воситалари намуналари экспертизадан ўтказиш мақсадида Фармацевтика маҳсулотлари хавфсизлиги марказига юборилиб, терговга қадар текширув ҳаракатлари олиб борилмоқда.
