Хитойда узунлиги 22,13 км бўлган Тяншан—Шенли туннели дунёдаги тезюрар йўллардаги энг узун туннел сифатида транспорт ҳаракати учун расман очилди. Бу ҳақда Sinxua агентлиги хабар бермоқда.
Шинжон-Уйғур автоном районидаги (ШУАР, Шимоли-Ғарбий Хитой) Тяншан тоғларининг марказий қисмидан ўтувчи туннел Тяншан тоғларининг ушбу қисмидан ўтиш вақтини бир неча соатдан тахминан 20 дақиқагача қисқартириш имконини беради.
Бундан ташқари, шу куни Г0711 Урумчи-Юли тезюрар автомагистрали тўлиқ ишга туширилган. Унинг бир қисми юқорида кўрсатилган туннел ҳисобланади. Магистрал ШУАРнинг шимоли ва жанубидаги шаҳар кластерларини боғлайди.
Узунлиги 2500 км бўлган Тяншан тоғлари марказий Шинжон бўйлаб чўзилган бўлиб, Шинжон шимолидаги энг йирик шаҳар Урумчини минтақанинг жанубидаги энг йирик шаҳар Корладан ажратиб туради. Тезюрар автомагистрал очилгандан сўнг, бу икки йирик шаҳар ўртасидаги саёҳат вақти 7 соатдан тахминан 3 соатгача қисқарган. Бу эса Шинжоннинг шимолий ва жанубий қисмлари ўртасидаги иқтисодий интеграцияга ва ташқи алоқалар учун янги йўллар яратилишига ёрдам беради.
Беш йил ичида қурилган тезюрар автомобиль йўлининг узунлиги 324,7 км бўлиб, унинг қурилишига киритилган инвестицияларнинг умумий ҳажми 46,7 миллиард юанни (тахминан 6,63 миллиард АҚШ доллари) ташкил этди.
Туннел қурилиши унинг ғайриоддий ўлчамлари туфайли глобал миқёсдаги муаммолар билан кечган. Туннелнинг узунлиги 22,13 км, максимал чуқурлиги 1112,2 метр бўлиб, 16 та геологик ёриқлар зонасини кесиб ўтади ва қурилишда — юқори геологик босим, юқори сейсмик фаоллик, қатъий экологик талаблар, жуда совуқ иқлим ва денгиз сатҳидан баландлик каби бешта асосий қийинчиликка дуч келинган.
