Хитой Соҳил қўриқлаш хизматининг кемалари Жанубий Хитой денгизидаги баҳсли саёзликда 20 та Филиппинга тегишли балиқчилар қайиғига сув тўплари билан ҳужум қилди. Бу ҳақда Филиппин Соҳил қўриқлаш хизматига таяниб Тhе Economic Times хабар берди.
Мазкур ҳаётга хавф туғдирувчи ҳужум оқибатида уч нафар филиппинлик жароҳат олган ва уларнинг иккита қайиғи шикастланган. Маълум қилинишича, 12 декабрь куни тушдан кейин Сабина саёзлиги яқинида Хитой соҳил қўриқлаш хизмати ходимлари кичикроқ резина қайиқларда атайин бир қанча Филиппин қайиқларининг лангар арқонларини кесиб ташлаган.
Бу эса кучли оқим ва баланд тўлқинлар остида кемалар ва уларнинг экипажларини хавф остига қўйган. Ҳодисага Хитой расмийлари изоҳ бермаган, бироқ улар ўзларига тегишли деб даъво қилинаётган ҳудудларни ҳар қандай йўл билан ҳимоя қилишини айтиб келади.
Хитой даъвоси халқаро суд қарорига зид
Жанубий Хитой денгизи бутун дунё савдоси учун муҳим йўл ҳисобланади. Шу сабабли ҳам Хитой уни деярли тўлиқ ўзиники деб даъво қилади. Гарчи 2016-йилдаги БМТ конвенцияси Пекиннинг бу кенг қамровли даъвосини ноқонуний деб топган бўлса ҳам, Хитой бу қарорни тан олмасдан, уни “сохта” деб рад этишда давом этмоқда.
Филиппин Соҳил қўриқлаш хизмати филиппинликларга ёрдам бериш учун Сабина саёзлиги яқинига иккита кема юборган, аммо улар Хитой кемаларининг тўсиғига дуч келган. Филиппин Соҳил қўриқлаш хизмати вакили Коммодор Жей Тарриэланинг онлайн брифингда айтишича, Хитой кемаларидан бири кечқурун Филиппин кемаларидан бирига 32 метр масофагача яқинлашган.
“Хитой соҳил қўриқлаш хизмати энди оддий балиқчи ва фуқароларни нишонга олмоқда. Пекин филиппинлик балиқчиларнинг ҳаётини хавф остига қўймоқда”, деган Тарриэла.
Филиппин соҳил қўриқлаш хизмати 13 декабрь куни баёнот бериб, қуйидагиларни таъкидлаган:
“Филиппин соҳил қўриқлаш хизмати бугун эрталаб балиқчиларга ёрдамга етиб борди. Жароҳатланганларга зудлик билан тиббий ёрдам, шунингдек, зарурий таъминотлар етказилди”.
