Нидерландиянинг Амстердам шаҳрида академик эшкак эшиш бўйича жаҳон чемпионати бўлиб ўтмоқда. Унда Ўзбекистон терма жамоаси мусобақадаги тарихий медалга сазовор бўлди.
Миллий олимпия қўмитаси хабарига кўра, енгил вазнли спортчилар ўртасидаги жуфтлик дастурида иштирок этган Шаҳзод Нурматов ва Собир Сафаралиев дуэти маррага биринчи бўлиб етиб келган.
Қайд этилишича, бу ўзбекистонлик академик эшкак эшувчиларнинг катталар ўртасидаги Жаҳон чемпионатларида қўлга киритган илк олтин медали ҳисобланади. Мазкур йўналишдаги баҳсларда Ўзбекистон вакиллари Германия (кумуш медал) ҳамда АҚШ (бронза медал) спортчиларини ортда қолдиришга муваффақ бўлган.
Маълумот учун, жорий йилнинг 24–30 август кунлари бўлиб ўтаётган 54-Жаҳон чемпионати Халқаро академик эшкак эшиш федерацияси ҳамда Нидерландия қироллик федерацияси ҳамкорлигида ташкил этилган. 28 август ҳолатига кўра, умумжамоа ҳисобида Мексика терма жамоаси 2 та олтин ва 1 та бронза медали билан рейтинг жадвалида пешқадамлик қилмоқда. Германия ҳамда Греция вакиллари 1 тадан олтин ва кумуш медалларга эга чиқиб, 2-ўринни ўзаро бўлишиб турибди. Кучли учликни эса АҚШ делегацияси якунлаб берган (1 та олтин, 1 та бронза). Эътиборлиси, ўз ҳисобига тарихий олтин медални ёздириб қўйган Ўзбекистон делегацияси турнир жадвалида кучли бешликдан жой олган.
